ភ្នំពេញ៖ អាជ្ញាធរនឹងបិទមិនឱ្យយានជំនិះគ្រប់ប្រភេទ ចរាចរនៅកំណាត់មហាវិថីឈ្នះឈ្នះចាប់ពីគល់ស្ពានព្រែកព្នៅរហូតដល់ផ្លុវជាតិលេខ៦ នៅថ្ងៃពិធីបើកអាស៊ានប៉ារ៉ាហ្គេមទី០៣ ខែមិថុនា ឆ្នាំ២០២៣ និងពិធីបិទនៅថ្ងៃទី០៩ ខែមិថុនា។ ក្នុងអំឡុងការប្រកួតអាស៊ានប៉ារ៉ាហ្គេមចាប់ពីថ្ងៃទី០៣-០៩ ខែមិថុនា អាជ្ញាធរមិនអនុញ្ញាតឱ្យរថយន្តដឹកទំនិញធុនធ្ងន់ឆ្លងកាត់លើកំណាត់ផ្លូវនេះឡើយ។

ក្រៅពីថ្ងៃពិធីបើក និងពិធីបិទអាស៊ានប៉ារ៉ាហ្គេម យានជំនិះផ្សេងៗអាចធ្វើដំណើរឆ្លងកាត់បានជាធម្មតា ប៉ុន្តែលើកលែងតែរយន្តដឹកទំនិញធុនធ្ងន់ រថយន្តដឹកដី រថយន្តដឹកខ្សាច់ និងរថយន្តកុងតឺន័រ ពោលមិនអនុញ្ញាតឱ្យធ្វើចរាចរឡើយ។

រដ្ឋបាលរាជធានីភ្នំពេញបានណែនាំពលរដ្ឋបញ្ចៀសការធ្វើដំណើរតាមកំណាត់ផ្លូវដែលប្រារព្ធកម្មវិធី ដោយអាជ្ញាធរបិទកំណាត់ផ្លូវនោះគឺដើម្បីសម្រួលការរៀបចំព្រឹត្តិការណ៍អាស៊ានប៉ារ៉ាហ្គេមប្រព្រឹត្តិទៅដោយរលូន។

គូសបញ្ជាក់ថា ព្រឹត្តិការណ៍ប្រកួតកីឡាអាស៊ានប៉ារ៉ាហ្គេមនឹងធ្វើឡើងចាប់ពីថ្ងៃទី០៣-០៩ ខែមិថុនា ឆ្នាំ២០២៣ ដោយមានប្រតិភូកីឡាក្រៅប្រទេសចំនួន១១ សរុបជាង២ពាន់នាក់ នឹងចូលរួមប្រកួតលើប្រភេទកីឡាចំនួន១៤ មានដូច វាយសី ប៊ូស្យា អុក យូដូ បាល់ទាត់ជនពិការភ្នែក បាល់ទាត់ចលករខួរក្បាល ហែលទឹក បាល់បោះរទេះ បាល់ទះអង្គុយ វាយកូនឃ្លីលើតុជនពិការ បាល់បោះជនពិការ កីឡាលើកទម្ងន់ជនពិការ កីឡាE-Sport និងកីឡាអត្តពលកម្មជនពិការ៕