ភ្នំពេញ៖ ខណៈនៅតាមបណ្តាប្រទេសមួយចំនួនលើសាកលលោកកំពុងរាតត្បាតវីរុសកូវីដ-១៩ បំប្លែងថ្មី ពពួក Omicron XBB.1.5 និងពពួកថ្មីៗផ្សេងៗទៀត ក្រសួងសុខាភិបាលកម្ពុជាបានក្រើនរំលឹកពលរដ្ឋអាយុចាប់ពី៣ឆ្នាំឡើងទៅ ទៅទទួលការចាក់វ៉ាក់សាំងកូវីដ-១៩ ដូសជំរុញឱ្យបានគ្រប់ៗគ្នា។

ក្រសួងសុខាភិបាលបានណែនាំឪពុកម្តាយ និងអាណាព្យាបាលទាំងអស់នាំកូនអាយុចាប់ពី៣ឆ្នាំដល់អាយុក្រោម៥ឆ្នាំ អាយុចាប់ពី៥ឆ្នាំដល់អាយុក្រោម១២ឆ្នាំ និងអាយុចាប់ពី១២ឆ្នាំឡើងទៅ ទៅចាក់វ៉ាក់សាំងកូវីដ-១៩ ដូសជំរុញ ដើម្បីបង្កើនភាពស៊ាំបុគ្គល និងសហគមន៍ និងទប់ស្កាត់ការឆ្លងរាលដាលជំងឺកូវីដ-១៩ សាជាថ្មី។

ពលរដ្ឋ និងឪពុកម្តាយអាចនាំកូនទៅចាក់វ៉ាក់សាំងនៅតាមមូលដ្ឋានសុខាភិបាលសាធារណៈ រួមមានមន្ទីរពេទ្យជាតិ មន្ទីរពេទ្យបង្អែក និងមណ្ឌលសុខភាព ទូទាំងរាជធានី-ខេត្តទាំង២៥ ដែលស្ថិតនៅជិតទីលោកអ្នក។

រដ្ឋលេខាធិការក្រសួងសុខាភិបាល លោកស្រី ឱ វណ្ណឌីន បាននិយាយថា វីរុសកូវីដ-១៩ មិនទាន់ទៅណាឆ្ងាយពីមនុស្សនៅឡើយទេ។ លោកស្រី បានណែនាំពលរដ្ឋត្រូវបន្តការប្រុងប្រយ័ត្នផ្ទាល់ខ្លួន ដើម្បីសុខភាពល្អរៀងៗខ្លួន និងទប់ស្កាត់ការវិលត្រឡប់ទៅរកសភាពលំបាករស់នៅដូចពេលមុនៗដោយពលរដ្ឋត្រូវរួមគ្នាបន្ត៣ការពារ និង៣កុំ។

លោកស្រីថ្លែងថា៖«យើងមិនដឹងថានឹងមានការបំប្លែងវីរុសកូវីដ-១៩ថ្មី ដល់ត្រឹមណាទេ ហើយបើវាចេះតែបំប្លែងខ្លួនវាដូច្នេះ ហើយបើវាអាចចាប់ដៃជាមួយមេរោគផ្សេងៗទៀត ក្លាយជាមេរោគថ្មីស្រឡាងមួយទៀតដែលមានភាពឆ្លងខ្លាំងជាងមុនៗ និងធ្ងន់ធ្ងរជាងពេលមុនៗនោះ តើពិភពលោក នឹងអាចកើតមានជាវិបត្តិធ្ងន់ធ្ងរទៀតដែរទេ?»៕