ព្រះសីហនុ៖ រថយន្តស៊េរីទំនើបម៉ាក Range Rover ១គ្រឿងបានឆេះហ្មត់សល់តែគ្រោងឆ្អឹង បន្ទាប់ពីម្ចាស់រថយន្តបានជួលឱ្យចិនជិះបាន ៣ម៉ោង។ ហេតុការណ៍នេះបានកើតឡើងនៅវេលាម៉ោង១២ជាងនាទីរំលងអាធ្រាត ឈានចូលថ្ងៃទី១៩ ខែឧសភា តាមបណ្ដោយផ្លូវអូរ៥ ឆ្ពោះទៅអូរឈើទាលត្រង់ផ្លូវបំបែកជាបីទៅអូត្រេះស្ថិតនៅក្នុងក្រុម១ ភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ។

តាមប្រភពសមត្ថកិច្ចនគរបាលស្នងការខេត្តព្រះសីហនុបានឲ្យដឹងថា ក្រោយពីទទួលបានដំណឹងនេះ អាជ្ញាធរបានចុះទៅអន្តរាគមន៍ដោយប្រើប្រាស់រថយន្តពន្លត់អគ្គីភ័យស្នងការនគរបាលខេត្តព្រះសីហនុអស់ទឹកចំនួនពីរ។

តាមការស្រាវជ្រាវសួរនាំរបស់កម្លាំងសមត្ថកិច្ចនគរបាលស្នងការខេត្តព្រះសីហនុដើម្បីស្វែងរកម្ចាស់រថយន្តក៏បានជួបអ្នកបកប្រែភាសាចិនម្នាក់គាត់ក៏បានណែនាំប្រាប់កម្លាំងសមត្ថកិច្ចថារថយន្តម៉ាក Range Rover បើកបរដោយជនជាតិចិនបានជួលពីម្ចាស់ជាជនជាតិខ្មែរឈ្មោះ ផន សុភា នៅរាជធានីភ្នំពេញ។

សមត្ថកិច្ចក៏បានសួរនាំអំពីមូលហេតុ ពោលបណ្ដាលមកពីឆ្លងចរន្តខ្សែភ្លើងនៅខាងក្នុងក្រោមរថយន្តទើបបណ្ដាលឱ្យឆេះតែម្ដង។ ក្រោយពីសមត្ថកិច្ចនគរបាលស្នងការនគរបាលខេត្តសួរនាំរួចក៏បានរៀបចំពន្លត់អគ្គិភ័យនេះរលត់រួចរាល់ផងដែរ៕