ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបន្តការរិះគន់ការស្រាវជ្រាវយោធា និងការបង្កើតសង្គ្រាមដោយប្រទេសនានាក្នុងពិភពលោក។ សម្ដចតេជោថាការប្រើប្រាស់លុយបង្កើតនូវអាវុធ និងពង្រឹងយោធានេះអ្នកដែលខាតបង់គឺមនុស្សជាតិទាំងមូល។
សម្ដេចថាសង្គ្រាមបានបង្ករវិនាសកម្ម បំផ្លាញសេដ្ឋកិច្ច សម្លាប់មនុស្ស ហើយអ្នកដែលចំណេញគឺអ្នកលក់អាវុធឯណោះទេ។ សម្ដេចថាប្រសិនជាគេកាត់បន្ថយលុយពីយោធាតែពាក់កណ្ដាលយកមកធ្វើការស្រាវជ្រាវវេជ្ជសាស្ត្រនោះពិតជាអាចជួយមនុស្សជាតិបានច្រើននិងធ្វើឱ្យពិភពលោកកាន់តែមានភាពសុខុដុមនីយ។
សម្ដេចថា៖ «យើងក៏នៅក្នុងក្របខ័ណ្ឌពិភពលោកក្នុងការទទួលខុសត្រូវលើកិច្ចការពារសុខមាលភាពប្រជាជនយើង»។
សម្ដេចតេជោថ្លែងបែបនេះក្នុងពេលដែលសម្ដេចអញ្ជើញថ្លែងក្នុងពិធីចែកសញ្ញបត្រជូននិស្សិតពេទ្យជាង១ពាន់នាក់ព្រឹកថ្ងៃទី១៨ ខែឧសភា ឆ្នាំ២០២៣នេះ នៅរាជធានីភ្នំពេញ៕