ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានកោរសរសើរទៅដល់សម្ដេចពិជ័យសេនា ទៀ បាញ់ ដែលបានដឹកនាំរៀបចំការប្រកួតស៊ីហ្គេមនៅកម្ពុជាបានយ៉ាងរលូន។ សម្ដេចលើកឡើងថា ការធ្វើម្ចាស់ផ្ទះនៃការប្រកួតស៊ីហ្គេមមានការលំបាកជាងការដឹកនាំកិច្ចប្រជុំកំពូលអាស៊ានទៅទៀត។

សម្ដេចថ្លែងបែបនេះនៅក្នុងពិធីប្រគល់សញ្ញាបត្រជូននិស្សិតសកលវិទ្យាល័យកសិកម្មចំនួន៣ នៅព្រឹកថ្ងៃទី១៥ ខែឧសភា ឆ្នាំ២០២៣ នេះនៅមជ្ឈមណ្ឌលកោះពេជ្រ។

សម្ដេចតេជោថា ការដឹកនាំកិច្ចប្រជុំកំពូលអាស៊ាន យើងមានបញ្ហាតែពីរប៉ុណ្ណោះគឺការរៀបចំសុវត្ថិភាពជូនមេដឹកនាំប្រទេសនានាដែលមកចូលរួមកិច្ចប្រជុំនិងការរៀបចំធ្វើយ៉ាងណាឲ្យចេញជាសេចក្ដីថ្លែងការណ៍រួមនៃកិច្ចប្រជុំ។

ខណៈដែលការប្រកួតស៊ីហ្គេមវិញគឺប្រទេសជាម្ចាស់ផ្ទះត្រូវមានការរៀបចំច្រើនទាំងទីលានប្រកួត ទាំងសុវត្ថិភាពរបស់កីឡាករកីឡាការិនីដែលមានរាប់ម៉ឺននាក់ ការដឹកជញ្ជូននិងកន្លែងស្នាក់នៅរបស់កីឡាករផងដែរ។

សម្ដេចថា៖ «អញ្ចឹងទេបានខ្ញុំមានមោទកភាពដែលទាក់ទងជាមួយនឹងការដឹកនាំអនុវត្តរបស់សម្ដេចពិជ័យសេនា ទៀ បាញ់»។

នៅសល់តែប្រមាណតែពីរថ្ងៃទៀតប៉ុណ្ណោះការប្រកួតស៊ីហ្គេមនៅកម្ពុជានឹងត្រូវបានបញ្ចប់ ខណៈប្រទេសចំនួន៣ ដែលកំពុងនាំមុខគេនៅក្នុងការទទួលមេដាយស៊ីហ្គេមមានដូចជា ប្រទេសវៀតណាម ប្រទេសថៃ និងប្រទេសកម្ពុជា៕