ភ្នំពេញ៖ អតីតប្រធានអង្គការតម្លាភាពកម្ពុជាដែលរិះគន់រដ្ឋាភិបាលរឿងអំពើពុករលួយ លោក ព្រាប កុល ពេលនេះត្រូវបានព្រះមហាក្សត្រតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី ដែលជាតំណែងជាន់ខ្ពស់មួយនៃរដ្ឋាភិបាលកម្ពុជា ដែលជាតំណែងជាន់ខ្ពស់មួយនៃរដ្ឋាភិបាលកម្ពុជា។
ក្នុងព្រះរាជក្រឹត្យឡាយព្រះហស្ថលេខាដោយសម្ដេចព្រះបរមនាថ នរោត្តម សីហមុនី ថ្ងៃទី១៣ ខែឧសភា លោក ព្រាប កុល ត្រូវបានតែងតាំងបន្ទាប់ពីមានការក្រាបបង្គំថ្វាយស្នើសុំពីនាយករដ្ឋមន្ត្រី សម្ដេចតេជោ ហ៊ុន សែន។
ក្រៅពីនោះយើងក៏ឃើញមានរូបភាពដែលលោក ព្រាប កុល បានអង្គុយពិភាក្សាជាមួយនាយករដ្ឋមន្ត្រីចំនួន ៤សន្លឹកផងដែរ។
គួរឱ្យដឹងផងដែរនៅមុនការបោះឆ្នោតថ្នាក់ជាតិឆ្នាំ២០២៣នេះ មានចលនានៃការសុំចុះចូលជាមួយរដ្ឋាភិបាលកាន់តែច្រើនពីសកម្មជន និងអ្នកដែលធ្លាប់រិះគន់រាជរដ្ឋាភិបាល។ ការស្នើសុំចុះចូលនេះក៏ត្រូវបាននាយករដ្ឋមន្ត្រីកម្ពុជា និងជាប្រធានបក្សប្រជាជនស្វាគមន៍ជាបន្តបន្ទាប់ផងដែរ។
ថ្មីៗនេះអ្នកវិភាគម្នាក់នៅសហរដ្ឋអាមេរិកលោក ស៊ូ ណារ៉ូ ក៏ត្រូវបានព្រះមហាក្សត្រតែងតាំងជារដ្ឋមន្ត្រីប្រតិភូអមនាយករដ្ឋមន្ត្រីផងដែរ៕
