ភ្នំពេញ: ថវិកាឧបត្ថម្ភលើកទឹកចិត្តចំនួន១០លានរៀលរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានធ្វើឱ្យបុគ្គលទី៧លាន ដែលទទួលបានការចាក់វ៉ាក់សាំងសប្បាយ ត្រេកអរយ៉ាងខ្លាំង ទប់ទឹកភ្នែកពុំបាន ខណៈលោកយាយចាន់ ឃីម បានទាំងការចាក់វ៉ាក់សាំងការពារអាយុជីវីតនិងបានទាំងថវិកាលើកទឹកចិត្ត។

ថ្លែងទៅកាន់អ្នកសារព័ត៌មាន លោកយាយ ចាន់ ឃីម បានលើកឡើងពីសុខភាពក្រោយចាក់វ៉ាក់សាំងថា «ក្រោយចាក់វ៉ាក់សាំងហើយ សុខភាពល្អធម្មតា ហូបបាយបាន សម្រាន្ដក៏លក់ ខ្ញុំសប្បាយចិត្ដណាស់ សុខភាពល្អហើយ បានការពារជំងឺកូវីដ-១៩ទៀត»។ ជាងនេះទៅទៀតលោកយាយ ក៏បានអំពាវនាវដល់ពលរដ្ឋ ដែលមិនទាន់បានទៅចាក់វ៉ាក់សាំង សូមទៅចាក់ការពារជំងឺកូវីដ-១៩ ឲ្យបានគ្រប់ៗគ្នា។ ហើយថែមបានចាត់ទុកថវិកានេះប្រៀបដូចជាថវិកាព្រះប្រទានដែលនឹកស្មានមិនដល់។

អំណោយដែលនាំទៅជូនលោកយាយចាន់ ឃីម រស់នៅភូមិកន្ត្រក សង្កាត់ស្វាយដង្គំ ក្រុងសៀមរាប ខេត្តសៀមរាបរូបនេះ ក្រៅតែពីថវិកា១០លានរៀលទៅ ក៏មានការផ្តល់ជំនួយជាស្បៀងអាហារមានអង្ករ ទឹកត្រី ទឹកស៊ីអ៉ីវ និងត្រីខកំប៉ុងជាដើម៕