ភ្នំពេញ​៖ កីឡដ្ឋានធំ នៃពហុកីឡដ្ឋានជាតិមរតកតេជោ ដែលបានបើកការដ្ឋានសាងសង់ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា កាលពីថ្ងៃទី០៤ ខែមេសា ឆ្នាំ២០១៧  កន្លងទៅនោះ នៅពេលនេះបានបញ្ចប់ការសាងសង់ស្ទើរតែ ១០០ភាគរយទៅហើយ ដែលកីឡដ្ឋានដ៏ប្រណិតនេះទទួលស្វាគមន៍រាល់ការប្រកួតកីឡាគ្រប់ប្រភេទ ជាពិសេសការត្រៀមទទួលពិធីបើក បិទនៃព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ខាងមុខនេះ។

បើតាមការបញ្ជាក់របស់លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា បានឱ្យដឹងថា កីឡដ្ឋានធំនេះគ្រោងនឹងបញ្ចប់់ការសាងសង់រួចរាល់ជាផ្លូវការនាខែសីហានេះ ត្បិតការងារផ្សេងៗពាក់ព័ន្ធនឹងការសាងសង់បានបញ្ចប់រួចរាល់ទៅហើយ ទាំងផ្នែកខាងក្នុង និងខាងក្រៅកីឡដ្ឋាន ហើយនៅសល់តែចំនុចបច្ចេកទេសមួយចំនួនទៀតប៉ុណ្ណោះដែលត្រូវពិនិត្យឱ្យរួចរាល់ ដូចជាប្រព័ន្ធភ្លើង ប្រព័ន្ធសំឡេង និងផ្ទាំង LED ក្នុងកីឡដ្ឋានជាដើម។ លោកបានលើកឡើងបន្ថែមទៀតថា ចំពោះតួសំំណង់កិឡដ្ឋានទាំងមូល រួមជាមួយទីលានរត់អត្តពលិកកម្មជុំវិញទីលាន និងស្មៅធម្មជាតិសម្រាប់ការប្រកួតបាល់់ទាត់ រួមជាមួយការបំពាក់កៅអីក្នុងកីឡដ្ឋានជាដើម បានបញ្ចប់ការសាងសង់ និងស្ថាបនារួចរាល់ហើយ។ 

គួរបញ្ជាក់ថា ពហុកីឡដ្ឋានជាតិមរតកតេជោ មានទីតាំងស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ដែលបានចំណាយកញ្ចប់ទឹកប្រាក់សាងសង់ប្រមាណ ១៦០លានដុល្លារអាមេរិក ជាជំនួយឥតសំណងរបស់រដ្ឋាភិបាលសាធារណរដ្ឋប្រជាមានិតចិន និងប្រជាជនចិនមកកាន់រាជរដ្ឋាភិបាលកម្ពុជា។ កីឡដ្ឋានដ៏ប្រណិត និងទំនើបនេះ អាចផ្ទុកអ្នកទស្សនាបានប្រមាណ ៦ម៉ឺននាក់នេះ ដើម្បីត្រៀមស្វាគមន៍ព្រឹត្តិការណ៍ប្រវត្តិសាស្ដ្រកីឡាស៊ីហ្គេម និងអាស៊ានប៉ារ៉ាហ្គេម នាឆ្នាំ២០២៣ នៅកម្ពុជា៕