សហរដ្ឋអាមេរិក៖ នាយកដ្ឋានដឹកជញ្ជូនសហរដ្ឋអាមេរិក (USDOT) បានបញ្ជាក់នៅថ្ងៃទី០៣ ខែឧសភាថា សហរដ្ឋអាមេរិកនឹងអនុញ្ញាតឱ្យក្រុមហ៊ុនអាកាសចរណ៍ចិនបង្កើនសេវាកម្មដឹកអ្នកដំណើរអាមេរិកដល់ ១២ជើងទៅមកប្រចាំសប្តាហ៍ ដែលស្មើគ្នានឹងចំនួនជើងហោះហើរដែលទីក្រុងប៉េកាំងបានអនុញ្ញាតសម្រាប់ក្រុមហ៊ុនអាកាសចរណ៍អាមេរិក។

គួរបញ្ជាក់ថា នេះគឺជាការបង្កើនចំនួនជើងហោះហើរពីចំនួន ៨ជើងហោះហើរទាំងប្រាំបីប្រចាំសប្តាហ៍ដែលបច្ចុប្បន្នត្រូវបានអនុញ្ញាតដោយក្រុមហ៊ុនអាកាសចរណ៍ចិន និងជាចំំនួនដែលត្រូវបានអនុញ្ញាតដោយអាមេរិកដូចគ្នា ដែលនេះគឺជាចំនួនដែលតិចតួចមែនបើប្រៀបទៅនឹងចំនួនដែលត្រូវបានអនុញ្ញាតដោយភាគីទាំងសងខាងចំនួន ១៥០ជើងហោះហើរទៅមកប្រចាំសប្តាហ៍ មុនពេលដែលត្រូវបានហាមឃាត់ដោយសារការផ្ទុះឡើងនៃវីរុសកូវីដ-១៩ បានផ្ទុះឡើងកាលពីឆ្នាំ២០២០។ 

USDOT បានបញ្ជាក់ថា គោលដៅនៃការបង្កើនជើងហោះហើរនេះគឺជាការបើកជាបណ្តើរៗ និងទូលំទូលាយនៃទីផ្សារសេវាកម្មផ្លូវអាកាសអាមេរិក-ចិន។ គួរបញ្ជាក់ថា ប្រទេសចិនកាលពីខែមីនាបានបើកព្រំដែនរបស់ខ្លួនឡើងវិញសម្រាប់ភ្ញៀវទេសចរបរទេសជាលើកដំបូងក្នុងរយៈពេលបីឆ្នាំ បន្ទាប់ពីបានបិទខ្ទប់ប្រទេសរបស់ខ្លួនដោយសារបញ្ហានៃការព្រួយបារម្ភទាក់ទងនឹងបញ្ហាកូវីដ-១៩។ គួរឱ្យដឹងថា ក្រុមហ៊ុនអាកាសចរណ៍អាមេរិក American Airlines, Delta Air Lines និង United Airlines បានដំណើរការសេវាកម្មដឹកអ្នកដំណើរតាមកាលវិភាគរបស់ខ្លួនរវាងប្រទេសចិន និងសហរដ្ឋអាមេរិកជាធម្មតា ខណៈចិនមានជើងហោះហើរតាមរយៈក្រុមហ៊ុនអាកាសចរណ៍មួយចំនួនដូចជា Xiamen Airlines, Air China, China Southern Airlines និង China Eastern Airlines៕