អន្តរជាតិ៖ អ្នកត្រួសត្រាយផ្លូវនៃបច្ចេកវិទ្យាបញ្ញាសិប្បនិម្មិត (AI) បានិយាយថា លោកបានសម្រេចចិត្តចាកចេញពីក្រុមហ៊ុន Google ដើម្បីឱ្យលោកអាចមានសេរីភាពក្នុងការនិយាយអំពីគ្រោះថ្នាក់នៃបច្ចេកវិទ្យានេះ បន្ទាប់ពីលោកបានយល់ និងដឹងថាកុំព្យូទ័រអាចនឹងកាន់តែឆ្លាតជាងមនុស្សលឿនខ្លាំងជាងការគិតទុក ដែលជាការរំពឹងពីមុនមករបស់លោក និងអ្នកជំនាញផ្សេងទៀត។ 

លោក Geoffrey Hinton បានសរសេរនៅលើគណនី Twitter ផ្ទាល់ខ្លួនរបស់លោកថា៖ "ខ្ញុំបានចាកចេញដើម្បីឱ្យខ្ញុំអាចនិយាយអំពីគ្រោះថ្នាក់នៃ AI ដោយមិនគិតពីរបៀបដែលវាប៉ះពាល់ដល់ Google"។ ដោយឡែក នៅក្នុងកិច្ចសម្ភាសន៍ជាមួយសារព័ត៌មាន New York Times លោក Hinton បាននិយាយថា លោកមានការព្រួយបារម្ភអំពីសមត្ថភាពរបស់ AI ក្នុងការបង្កើតរូបភាព និងអត្ថបទមិនពិត ដែលនឹងបង្កើតពិភពលោកមួយថ្មីដែលមនុស្សនឹងមិនអាចដឹងពីអ្វីដែលជាការពិតទៀតទេ។ លោកថាបច្ចេកវិទ្យាអាចផ្លាស់ និងប៉ះពាល់ដល់ការងាររបស់មនុស្សយ៉ាងឆាប់រហ័ស ហើយវានឹងក្លាយជាគ្រោះថ្នាក់កាន់តែខ្លាំងកាលណាបច្ចេកវិទ្យានេះបានរៀនពីអ្វីដែលថ្មីៗផ្សេងទៀត។ 

តាមរយៈការ Tweet របស់លោកនៅលើ Twitter លោក Hinton បាននិយាយថា Google ខ្លួនឯងបានធ្វើសកម្មភាពរបស់ខ្លួនប្រកបដោយទំនួលខុសត្រូវ ហើយលោកបានបដិសេធថាលោកបានលាលែងពីតំណែង ដើម្បីឱ្យលោកអាចធ្វើការរិះគន់ទៅលើអតីតក្រុមការងាររបស់លោកបាន។ ដោយឡែក ក្រុមហ៊ុន Google ដែលជាផ្នែកមួយនៃក្រុមហ៊ុន Alphabet Inc. មិនបានឆ្លើយតបភ្លាមៗណាមួយចំពោះការលើកឡើងរបស់លោក Geoffrey Hinton ឡើយ។ 

កាសែត The Times បានដកស្រង់សម្តីប្រធានផ្នែកវិទ្យាសាស្ត្ររបស់ Google លោក Jeff Dean ដែលបាននិយាយនៅក្នុងសេចក្តីថ្លែងការណ៍មួយថា Google នៅតែប្តេជ្ញាចិត្តចំពោះវិធីសាស្រ្តប្រកបដោយការទទួលខុសត្រូវចំពោះ A.I. យើង​កំពុង​បន្ត​រៀន​ស្វែងយល់​ពី​ហានិភ័យ​ដែល​កំពុង​កើត​ឡើង ហើយក៏ទទួលបាននូវការបង្កើតថ្មីដ៏អស្ចារ្យជាច្រើនផងដែរ។ OpenAI ដែលគាំទ្រដោយក្រុមហ៊ុន Microsoft បានធ្វើការចេញផ្សាយនូវកម្មវិធី ChatGPT កាលពីខែវិច្ឆិកា ដែលអាចបង្កើតអត្ថបទ ឬរូបភាពថ្មី ដែលនាំឱ្យមានការព្រួយបារម្ភជាខ្លាំងនាពេលអនាគត៕