ព្រះសីហនុ៖ អគ្គិភ័យបានកើតឡើងបណ្ដាលឱ្យឆេះផ្ទះ០១ខ្នង សង់អំពីឈើខាងលើ និងរៀបឥដ្ឋខាងក្រោម ប្រកស៊ីបប្រូ នៅថ្ងៃទី២៨ ខែមេសា ឆ្នាំ២០២៣ វេលាម៉ោង០៨ព្រឹក ស្ថិតនៅភូមិស្រែចាមលើ ឃុំអូរជ្រៅ ស្រុកព្រៃនប់ ខេត្តព្រះសីហនុ។
សមត្ថកិច្ចបានបញ្ជាក់ថា អគ្គិភ័យនេះគឺបណ្តាលមកពីឆ្លងចរន្ដអគ្គីសនី។ យោងតាមការបំភ្លឺរបស់កូនស្រីម្ចាស់ផ្ទះជនរងគ្រោះ មុនពេលកើតហេតុ គាត់បានកំពុងតែដេរមងនៅក្រោមផ្ទះ ស្រាប់តែធុំក្លិនឈ្ងៀម គាត់ក៏ដើររកមើល រួចក៏លឺសូសំលេងផ្ទុះអ្វីមួយនៅខាងលើផ្ទះ រួចគាត់ក៏បានឡើងទៅមើល ស្រាប់តែឃើញភ្លើងឆេះបាត់ទៅហើយ។ បន្ទាប់ពីភ្លើងឆេះភា្លម គាត់បានស្រែកហៅប្រជាពលរដ្ឋដែលរស់នៅជិតខាងឲ្យមកជួយ និងបានរាយការណ៍មកសមត្ថកិច្ចមកជួយអន្ដរាគមន៍ពន្លត់តែម្ដង ។
ករណីអគ្គីភ័យខាងលើ បណ្តាលឱ្យខូចខាតផ្ទះ សម្ភារនៅក្នុងផ្ទះទាំងស្រុងដូចជាមាស ០៨ជី ផ្លាកទីន ០៩ជី និងលុយខ្មែរ ០៣លានរៀល ប៉ុន្តែ មិនបណ្ដាលឲ្យមានមនុស្សរងរបួសឡើយ។
កម្លាំងអធិការដ្ឋាននគរបាលស្រុកព្រៃនប់ បានយករថយន្តពន្លត់អគ្គិភ័យរបស់អធិការដ្ឋាន០១គ្រឿង និងបាញ់ទឹកអស់ចំនួន ០១ រថយន្ត រលត់ទាំងស្រុង៕
