អ៊ូហ្គង់ដា៖ ប៉ូលិសអ៊ូហ្គង់ដាបានធ្វើការឃុំខ្លួនសមាជិកសភាជាស្ត្រីចំនួន ១១នាក់កាលពីថ្ងៃព្រហស្បតិ៍ម្សិលមិញ ដែលសមាជិកសភាជាស្រ្តីទាំងនោះត្រូវបានរងចោទប្រកាន់ថាបានរៀបចំការតវ៉ាដោយខុសច្បាប់ ខណៈសមាជិកសភាមួយចំនួនបានរងរបួសថែមទៀតផងអំឡុងពេលចាប់ខ្លួននេះ។
សមាជិកសភាទាំងនោះត្រូវបានឃុំខ្លួននៅខាងក្រៅអគារសភាក្នុងរដ្ឋធានី Kampala ខណៈដែលពួកគេបានរៀបចំក្បួនដង្ហែឆ្ពោះទៅកាន់ក្រសួងកិច្ចការផ្ទៃក្នុង ដែលពួកគេមានបំណងធ្វើការនាំយក និងប្រគល់ញ្ញត្តិតវ៉ាឱ្យទៅរដ្ឋមន្ត្រីនៃក្រសួងនេះ។ ក្រុមបណ្ដាអ្នកតវ៉ាទាំងនោះបានសំដែងការមិនពេញចិត្តចំពោះទង្វើរបស់កងកម្លាំងមួយចំនួនដែលពួកគេបាននិយាយថា អំពើឃោរឃៅរបស់ប៉ូលិស និងការប្រើប្រាស់កម្លាំងហួសហេតុ ដើម្បីបំបែកមុខងារផ្សេងៗ ដែលរៀបចំដោយសមាជិកសភាស្ត្រីនៅក្នុងមណ្ឌលបោះឆ្នោតក្នុងស្រុករបស់ពួកគេ ក្នុងប៉ុន្មានសប្តាហ៍ថ្មីៗនេះ។
អ្នកនាំពាក្យរងនៃសភាអ៊ូហ្គង់ដា លោក Thomas Tayebwa បានបញ្ជាក់នៅលើ Twitter របស់លោកថា៖ "ខ្ញុំសូមថ្កោលទោសយ៉ាងដាច់អហង្ការចំពោះទង្វើរបស់សមត្ថកិច្ច ដែលបានចាប់ខ្លួនសមាជិកសភាជាស្រ្តីចំនួន ១១នាក់ ដែលពួកគេទាំងនោះបានធ្វើសកម្មភាពដោយសន្តិវិធី និងពុំមានអាវុធក្នុងដៃ។ សកម្មភាពបង្ក្រាបនេះបណ្ដាលឱ្យមានរបួសហូរឈាម និងរហូតដល់រហែកខោអាវ ដែលសកម្មភាពទាំងនេះហាក់បីដូចជាការចាប់ខ្លួនភេរវករអញ្ចឹងដែរ។ ការចាប់ខ្លួនសមាជិកសភាទាំងោះត្រូវបានធ្វើឡើងដោយគ្មានការអៀនខ្មាសនៅមាត់ទ្វាររដ្ឋសភាតែម្តង។ អញ្ចឹងខ្ញុំមិនដឹងថា តើយើងមានសុវត្ថិភាពឬអត់ទេ បើមនុស្សអាចដាក់ពង្រាយនៅមាត់ទ្វារសភា ដើម្បីវាយប្រហារពលរដ្ឋដែលគ្មានអ្វីអាចបង្កគ្រោះថ្នាក់បានសោះបែបនេះ"។
វីដេអូនៃការប៉ះទង្គិចគ្នាដែលបានផ្សព្វផ្សាយនៅលើបណ្ដាញសង្គមបានបង្ហាញថាមន្ត្រីប៉ូលីសបានប្រឈមជាមួយសមាជិកសភា ហើយរុញពួកគេចូលក្នុងឡានតែម្តង។ ដោយឡែក អ្នកនាំពាក្យប៉ូលិស លោក Luke Owoyesigyire បានបដិសេធថា មន្ត្រីរបស់លោកមិនបានប្រើកម្លាំងហួសហេតុទេ។ ផ្ទុយទៅវិញ លោកបានចោទបានប្រកាន់ក្រុមសមាជិកសភា និងអ្នកតំណាងរាស្ត្រទាំងនោះថាមិនព្រមឱ្យចាប់ខ្លួន និងថែមទាំងបានធ្វើឲ្យមន្ត្រីប៉ូលិសមួយចំនួនរងរបួសទៀតផង។
គួរបញ្ជាក់ថា ជាច្រើនឆ្នាំកន្លងមក កងកម្លាំងសន្តិសុខអ៊ូហ្គង់ដាត្រូវបានចោទប្រកាន់ជាញឹកញាប់ពីអំពើឃោរឃៅ ជាពិសេសប្រឆាំងនឹងគូប្រជែងរបស់មេដឹកនាំជើងចាស់លោក Yoweri Museveni៕
