ជប៉ុន៖ រដ្ឋមន្រ្តីក្រសួងហិរញ្ញវត្ថុជប៉ុន លោក Shunichi Suzuki បាននិយាយនៅថ្ងៃសុក្រនេះថា ប្រទេស​ជប៉ុន​នឹង​អញ្ជើញបណ្ដា​ប្រទេស​ដែល​កំពុង​រីកចម្រើន​មួយ​ចំនួន​ឱ្យ​ចូល​រួម​កិច្ច​ប្រជុំ​ផ្សព្វផ្សាយ​នៅ​ក្នុង​ក្រុម​ប្រទេស​ជឿនលឿន​ទាំង​ប្រាំពីរ​ (G7 Group) ដែល​ជប៉ុននឹងធ្វើជាម្ចាស់ផ្ទះរៀបចំកិច្ចប្រជុំនេះនាខែក្រោយ ហើយកិច្ចប្រជុំនេះនឹងធ្វើឡើងនៅទីក្រុង Niigata។ 

លោក Suzuki បានលើកឡើងបន្ថែមនៅក្រោយកិច្ចប្រជុំគណៈរដ្ឋមន្រ្តីថា ប្រទេសដែលនឹងត្រូវអញ្ជើញឱ្យចូលរួមក្នុងកិច្ចប្រជុំផ្សព្វផ្សាយ G7 នៅក្នុងប្រទេសជប៉ុននាខែក្រោយនេះរួមមានដូចជា ប្រទេសឥណ្ឌា ឥណ្ឌូនេស៊ី កូរ៉េខាងត្បូង សិង្ហបុរី និងប្រេស៊ីល។

គួរបញ្ជាក់ថា ជប៉ុនគឺ​ជា​ប្រធាន​នៃ​កិច្ច​ប្រជុំនៃបណ្តាក្រុមប្រទេសមាន​សេដ្ឋកិច្ច​ជឿនលឿន ឬហៅកាត់ថា G7​ នៅក្នុងឆ្នាំ២០២៣​នេះ​​។ កិច្ចប្រជុំដែលនឹងចូលរួមដោយរដ្ឋមន្រ្តីហិរញ្ញវត្ថុ និងទេសាភិបាលធនាគារកណ្តាលនេះ គ្រោងនឹងធ្វើឡើងនៅ Niigata នៅថ្ងៃទី១១ ដល់ថ្ងៃទី១៣ ខែឧសភាខាងមុខនេះ។

បណ្តាក្រុមប្រទេសដែលមានសេដ្ឋកិច្ចជឿនលឿនទាំង ៧ ឬហៅកាត់ថាក្រុមប្រទេស G7 រួមមាន កាណាដា, បារាំង, អាល្លឺម៉ង់, អ៉ីតាលី, ជប៉ុន, ចក្រភពអង់គ្លេស​ និងសហរដ្ឋអាមេរិក៕