ភ្នំពេញ៖ មណ្ឌលត្រួតពិនិត្យលក្ខណៈបច្ចេកទេសយានយន្តទី២២ នៅកម្ពុជាបានបើកដំណើរការនៅក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ នៅព្រឹកថ្ងៃទី២១ ខែមេសា ឆ្នាំ២០២៣នេះ។

រដ្ឋមន្ត្រីសាធារណការលោកទេសរដ្ឋមន្ត្រី ស៊ុន ចាន់ថុល បានអញ្ជើញធ្វើជាអធិបតីក្នុងពិធីសម្ពោធនេះដោយផ្ទាល់។

ថ្លែងក្នុងពិធីបើកសម្ពោធតំណាងក្រុមហ៊ុន ខេមបូឌា ម៉ូធ័រវីហ៊ីឃល អ៊ិនស្ពេកសិន លោកស្រី ឌុយ ឌីរ៉ាប៊ី បានថ្លែងថាបច្ចុប្បន្នក្រុមហ៊ុនលោកស្រីមានមណ្ឌលត្រួតពិនិត្យយានយន្តចំនួន៦មណ្ឌលនៅភ្នំពេញ និង១៣មណ្ឌលនៅតាមបណ្ដាខេត្ត រួមទាំងមានរថយន្តឆៀកចល័តចំនូន៣គ្រឿងថែមទៀតដើម្បីបម្រើការត្រួតពិនិត្យរថយន្តនៅតាមបណ្ដាខេត្តដែលមិនទាន់មានមណ្ឌលឆៀក។

លោកស្រីថា៖ «សូមជម្រាបថាក្រុមហ៊ុន CMVIC បានផ្ដើមបំរើការឆៀកយានយន្តតាំងពីឆ្នាំ២០០០មកម្លេះ ហើយកាលនោះមានតែមណ្ឌលឆៀកតែ១ប៉ុណ្ណោះ។ ចាប់តាំងពីឆ្នាំ២០១៦មក ក្រុមហ៊ុនបានចាប់ផ្ដើមពង្រីកសាខាជាបន្តបន្ទាប់»។

រដ្ឋមន្ត្រីសាធារណការ ទេសរដ្ឋមន្ត្រី ស៊ុន ចាន់ថុល បានថ្លែងថាការបង្កើតមណ្ឌលត្រួតពិនិត្យលក្ខណៈបច្ចេកទេសនេះគឺដើម្បីសម្រួលដល់ការលំបាករបស់ប្រជាពលរដ្ឋដែលចង់យករថយន្តមកត្រួតពិនិត្យលក្ខណៈបច្ចេកទេសបញ្ចៀសនូវការយឺតយ៉ាវនានា។

លោកថា៖ «នេះយើងធ្វើអ្វីៗគឺទៅតាមការការណែនាំតាមអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ថាយើងជាអ្នកបម្រើរាស្ត្រត្រូវតែផ្ដល់សេវាសាធារណ សេវាចាំបាច់ជូនប្រជាពលរដ្ឋយើងធ្វើឱ្យមានប្រសិទ្ធភាពតម្លាភាព និងរហ័ស»។

ជាមួយគ្នានេះលោកទេសរដ្ឋមន្ត្រីបានសំណូមពររថយន្តដែលមិនទាន់ត្រួតពិនិត្យលក្ខណៈបច្ចេកទេសឱ្យទៅធ្វើការត្រួតពិនិត្យលក្ខណៈបច្ចេកទេសឱ្យរួចរាល់ដើម្បីបញ្ជៀសនូវការផាកពិន័យ និងគ្រោះថ្នាក់ផ្សេងៗដែលបណ្ដាលមកពីបច្ចេកទេសយានយន្ត។

បើតាមលោក ស៊ុន ចាន់ថុល បច្ចុប្បន្នបានរថយន្តដែលមិនទាន់យកទៅត្រួតពិនិត្យលក្ខណៈបច្ចេកទេសចំនួន ១៥៣ពាន់គ្រឿង ដែលស្មើនឹងប្រមាណ១៤%នៃរថយន្តដែលកំពុងប្រើប្រាស់នៅកម្ពុជា៕