កម្សាន្ត៖ ផលិតកម្ម Legendary Pictures ទើបតែបានបង្ហាញឈុតខ្លីដំបូងបង្អស់នៃខ្សែភាពយន្តថ្មីនៃស្រឡាយរឿងសត្វចម្លែកយក្ស Godzilla Vs Kong។ ខ្សែភាពយន្តដែលជាសែស្រឡាយថ្មីនេះត្រូវបានដាក់់ចំណងជើងថា Godzilla X Kong: The New Empire ដែលភាពយន្តនេះនឹងបន្តសាច់រឿងកាលពីឆ្នាំ២០២១ ដែលរកចំណូលបានប្រមាណជា ៤៧០លានដុល្លារអាមេរិកនៅជុំវិញពិភពលោក។ 

ឈុតខ្លីៗដែលមានរយៈពេល ៣៥វិនាទីបានបង្ហាញពីវត្តមានសត្វចម្លែកថ្មីមួយកំពុងអង្គុយនៅលើបល្ល័ង្កក្នុងពិភព Hollow Earth មុននឹងកាមេរ៉ាថតចេញមកបង្ហាញពីសាកសព (គ្រោងឆ្អឹង) ជាច្រើននៃសត្វចម្លែកយក្សរបស់ភាពយន្តមុនៗទាំងពីរគឺ Godzilla ជាមួយនិង Kong។ 

ខ្សែភាពយន្ត Godzilla X Kong: The New Empire នឹងត្រូវចាក់បញ្ចាំងជាផ្លូវការនៅថ្ងៃទី១៥ ខែមីនា ឆ្នាំ២០២៤។ ភាពយន្តនេះគឺជាខ្សែភាពយន្តទីប្រាំនៅក្នុងចក្រវាលសត្វចម្លែករបស់ផលិតកម្ម Legendary Pictures ដែលជាសិទ្ធិផ្តាច់មុខដែលផ្តោតលើ King Kong និងតួអង្គសត្វចម្លែកដែលបង្កើតឡើងដោយ Toho Co, Ltd ដែលរួមទាំង Godzilla និង Mothra។ 

តារាសម្តែង Rebecca Hall និង Brian Tyree Henry នឹងត្រលប់មកបង្ហាញខ្លួនឡើងវិញសាជាថ្មីនៅក្នុងភាគនេះ រួមជាមួយតារាសម្តែងទើបបង្ហាញមុខក្នុងចក្រវាលភាពយន្តនេះគឺលោក Dan Stevens។ គួរបញ្ជាក់ថា ភាពយន្តនេះក៏នៅតែជាស្នាដៃរបស់អ្នកដឹកនាំរឿង Godzilla vs. Kong កាលពីឆ្នាំ២០២១ ដដែលគឺលោក Adam Wingard។

ត្រឡប់ទៅកាន់ខែសីហា ឆ្នាំ២០២២ ផលិតកម្ម Legendary Pictures និង Warner Bros បានចេញផ្សាយសាច់រឿងសង្ខេបជាផ្លូវការនៃខ្សែភាពយន្តនេះ ដោយនឹងនាំអ្នកទស្សនាទៅស្វែងយល់បន្ថែមអំពីប្រវត្តិរបស់សត្វយក្សទាំងនេះ រួមជាមួយប្រភពដើម និងអាថ៌កំបាំងនៃកោះ Skull និងលើសពីនេះទៀត ខណៈពេលដែលមានការបង្ហាញពីសមរភូមិក្នុងទេវកថា ដែលបានជួយបង្កើតសត្វដ៏អស្ចារ្យទាំងនេះ ហើយបានចងពួកវាឱ្យនៅជាមួយមនុស្សជារៀងរហូត៕