កូរ៉េខាងត្បូង៖ សហរដ្ឋអាមេរិក ជប៉ុន និងម្ចាស់ផ្ទះកូរ៉េខាងត្បូង បានរៀបចំធ្វើសមយុទ្ធកងទ័ពជើងទឹកការពារកាំជ្រួចម៉ីសីលរួមគ្នាកាលពីថ្ងៃទី១៧ ខែមេសាម្សិលមិញ ខណៈដែលប្រទេសធំៗទាំងបីកំពុងជំរុញឱ្យមានកិច្ចសហប្រតិបត្តិការផ្នែកសន្តិសុខកាន់តែខ្លាំងឡើង ដើម្បីទប់ទល់នឹងការគំរាមកំហែងមីស៊ីលដែលកំពុងវិវត្តរបស់កូរ៉េខាងជើង។

សមយុទ្ធយោធានេះបានធ្វើប៉ុន្មានថ្ងៃប៉ុណ្ណោះ បន្ទាប់ពីប្រទេសទាំងបីបានព្រមព្រៀងគ្នានៅក្នុងកិច្ចចរចាត្រីភាគីរបស់មួយនៅឯទីក្រុងវ៉ាស៊ីនតោន សហរដ្ឋអាមេរិក ដើម្បីធ្វើសមយុទ្ធការពារមីស៊ីល និងប្រឆាំងនាវាមុជទឹក ដែលជាផ្នែកមួយនៃកិច្ចខិតខំប្រឹងប្រែងដើម្បីបង្កើនកិច្ចសហប្រតិបត្តិការការទូត និងយោធា។

សមយុទ្ធនៅថ្ងៃចន្ទនេះ ធ្វើឡើងនៅក្នុងដែនទឹកអន្តរជាតិរវាងកូរ៉េខាងត្បូង និងជប៉ុន ដោយនាំយកនាវាពិឃាតប្រភេទ Aegis "Yulgok Yi I" ទម្ងន់ ៧,៦០០តោនរបស់កូរ៉េខាងត្បូង នាវាពិឃាត USS Benfold របស់សហរដ្ឋអាមេរិក និងនាវាពិឃាត Atago របស់ប្រទេសជប៉ុន ដែលបំពាក់ដោយប្រព័ន្ធរ៉ាដា Aegis ផងដែរ។ កងទ័ពជើងទឹកកូរ៉េខាងត្បូងបាននិយាយថា ប្រទេសទាំងបីនឹងផ្តោតលើការឆ្លើយតបទៅវិញ ចាប់ពីការរាវរករហូតដល់ការតាមដាន ដល់ការចែករំលែកព័ត៌មាន ដោយបង្កើតគោលដៅនិម្មិត ក្រោមសេណារីយ៉ូនៃការបង្កហេតុមីស៊ីលផ្លោងរបស់កូរ៉េខាងជើង។

កាពីទែន Kim Ki-young នៃនាវាពិឃាតកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា៖ "វាគឺជាឱកាសមួយដើម្បីពង្រឹងកិច្ចសហប្រតិបត្តិការសន្តិសុខត្រីភាគីប្រឆាំងនឹងការគំរាមកំហែងនុយក្លេអ៊ែរ និងមីស៊ីលដែលកំពុងកើនឡើងរបស់កូរ៉េខាងជើងហើយពង្រឹងសមត្ថភាព និងជំហររបស់កងទ័ពជើងទឹករបស់យើងក្នុងការឆ្លើយតបទៅនឹងមីស៊ីល Ballistic"។ ភាពតានតឹងនៅឧបទ្វីបកូរ៉េហាក់កើនឡើងក្នុងរយៈពេលប៉ុន្មានសប្តាហ៍ថ្មីៗនេះ នៅពេលដែលកូរ៉េខាងជើងបានបង្កើនសកម្មភាពយោធា ដោយបានសាកល្បងកាំជ្រួចមីស៊ីលអន្តរទ្វីបថ្មីមួយកាលពីថ្ងៃសុក្រ។

ទីក្រុងព្យុងយ៉ាងបានគំរាមកំហែងថាអាចនឹងមានការវាយប្រហារណាមួយជាក់លាក់ ខណៈដែលកងកម្លាំងកូរ៉េខាងត្បូង និងសហរដ្ឋអាមេរិកបាននិងកំពុងធ្វើសមយុទ្ធនិទាឃរដូវប្រចាំឆ្នាំរបស់ពួកគេចាប់តាំងពីខែមីនា ដែលមួយចំនួនពាក់ព័ន្ធនឹងប្រទេសជប៉ុន ដោយហៅពួកគេថាជាការហាត់សមសម្រាប់សង្គ្រាមនុយក្លេអ៊ែរ។ ប្រធានាធិបតីកូរ៉េខាងត្បូង Yoon Suk Yeol បានសន្យាថានឹងផ្លាស់ប្តូរទំនាក់ទំនងរវាងកូរ៉េខាងត្បូង និងជប៉ុន ហើយលោកក៏បានធ្វើទស្សនកិច្ចនៅទីក្រុងតូក្យូ កាលពីខែមីនាកន្លងទៅដែលជាទស្សនកិច្ចរបស់ប្រធានាធិបតីកូរ៉េខាងត្បូងជាលើកដំបូងក្នុងរយៈពេល ១២ឆ្នាំចុងក្រោយ៕