ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន យល់ស្របនឹងការលើកឡើងរបស់លោកឧកញ៉ា ស្រី ចាន់ថន ដែលមិនគាំទ្រឱ្យកីឡាករជម្រើសជាតិដែលនឹងត្រៀមចូលរួមប្រកួតស៊ីហ្គេម និងប៉ារ៉ាហ្គេម ចូលរួមប្រកួតនៅតាមសង្វៀនផ្សេងៗមុនព្រឹត្តិការណ៍ស៊ីហ្គេមមកដល់នោះទេ។

សម្តេចនាយករដ្ឋមន្ត្រីកម្ពុជាថ្លែងថា ប្រសិនជាកីឡាករជម្រើសជាតិកម្ពុជាចូលរួមប្រកួតមុនព្រឹត្តិការណ៍ស៊ីហ្គេមមកដល់ ហើយមានរបួស នោះនឹងធ្វើឱ្យកីឡាករបាត់បង់ឱកាស ដូចជាករណីកីឡាករប្រដាល់ ឈាង ល្វៃ ដែលត្រូវរបួសជើង ដែលចាញ់គូប្រកួតកីឡាករថៃ សាមី បានចានមេក នៅថ្ងៃទី១៥ ខែមេសា ឆ្នាំ២០២៣ នៅខេត្តសៀមរាប ដែលធ្វើឱ្យសម្តេចព្រួយបារម្ភថា តើកីឡាករ ឈាង ល្វៃ អាចនឹងជាសះស្បើយទាន់ព្រឹត្តិការណ៍ស៊ីហ្គេមដែលនឹងមកដល់នៅ ១៩ថ្ងៃខាងមុខទៀត ឬអត់?

សម្តេចតេជោ៖ «សូមសហព័ន្ធកីឡាប្រដាល់ យកចិត្តទុកដាក់កុំឱ្យមានការថ្លោះធ្លោយណាមួយទាក់ទងនឹងគូដែលត្រូវចូលប្រកួតនៅក្នុងស៊ីហ្គេមនៅពេលខាងមុខ (ហាម) ចូលប្រកួតនៅសង្វៀនតាមទូរទស្សន៍នេះ ទូរទស្សន៍នោះ កន្លែងនេះ ឬកន្លែងនោះ បើមិនដូច្នោះយើងនឹងមានបញ្ហាទាក់ទងនឹងកម្រិតជាតិដែលនឹងត្រូវធ្វើនៅពេលខាងមុខ‍‍»៕