អង់គ្លេស៖ កីឡាករពីររូបរបស់ Manchester United គឺកីឡាករ Scott McTominay និង Anthony Martial  បានរួមគ្នាស៊ុតបញ្ចូលទីម្នាក់មួយគ្រាប់ឱ្យក្លិបយកជ័យជម្នះ ២-០ ទៅលើ Everton ល្ងាចមិញនេះ និងប្រជែង Newcastle United ឡើងមកកាន់ចំណាត់ថ្នាក់លេខ ៣ លើតារាង Premier League នៅយប់ថ្ងៃសៅរ៍នេះ។

ក្រុមរបស់លោក Erik Ten Hag កំពុងតែតស៊ូយ៉ាងស្វិតស្វាញក្នុងការប្រជែងចំណាត់ថ្នាក់ Top4 រដូវកាលនេះ ខណៈឆ្លងកាត់ ២៩ ប្រកួតមាន ៥៦ពិន្ទុក្នុងដៃលើក្រុម Newcastle ដែលមានត្រឹម ៥៣ពិន្ទុ ប៉ុន្តែនៅសល់ការប្រកួតមួយនៅក្នុងដៃ ដែលនឹងត្រូវជួបជាមួយ Brentford យប់នេះ និងដាច់ ៦ពិន្ទុពី Tottenham Hotspur ដែលនឹងត្រូវជួបជាមួយ Brighton យប់នេះដូចគ្នា។

គួរបញ្ជាក់់ថា Everton របស់លោក Sean Dyche កំពុងព្យាយាមប្រជែងគេចចេញឱ្យផុតពីតំបន់កាត់ចោល ខណៈបច្ចុប្បន្នកំពុងឈរនៅចំណាត់ថ្នាក់លេខ ១៦ មាន ២៧ពិន្ទុស្មើគ្នាជាមួយ Nottingham Forest ដែលកំពុងឈរលេខ១៧ និង Bournemouth ដែលកំពុងឈរលេខ១៨ ដោយខុសគ្នាតែគម្លាតគ្រាប់បាល់ចំណេញប៉ុណ្ណោះ។ 

គួរបញ្ជាក់ថា Manchester United ល្ងាចមិញនេះអវត្តមានរបស់ Casemiro ដែលត្រូវរងបំរាមចំនួន ៤ប្រកួត ប៉ុន្តែស្របពេលដែលវត្តមានខ្សែបម្រើ Christian Eriksen បានបង្ហាញខ្លួនសាជាថ្មីឡើងវិញ ដោយប្តូរចូលជំនួស Jadon Sancho នៅនាទីទី៧៧ ដែលជាការបង្ហាញខ្លួនរបស់គេជាលើកដំបូងបង្អស់ក្រោយអវត្តមានដោយបញ្ហារបួសក-ជើងកាលពីថ្ងៃទី២៨ ខែមករាកន្លងទៅ៕