ភ្នំពេញ៖ គណកម្មាធិការជាតិរៀបចំការបោះឆ្នោតបានជម្រាបដល់គណបក្សដែលបានចុះបញ្ជីនៅក្រសួងមហាផ្ទៃរួចហើយ និងមានបំណងសុំចុះបញ្ជីគណបក្សនយោបាយឈរឈ្មោះបោះឆ្នោតអាណត្តិទី៧ ឆ្នាំ២០២៣ ឱ្យបំពេញនូវនូវបែបបទ និងពាក្យសុំមកកាន់ គ.ជ.ប ដោយអនុវត្តន៍នូវការកំណត់មួយចំនួន។
ក្នុងសេចក្ដីជូនដំណឹងចុះថ្ងៃទី៥ ខែមេសា ឆ្នាំ២០២៣ អគ្គលេខាធិការ គ.ជ.ប លោក ទេព នីថា បានលើកឡើងថាដើម្បីចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោតបានតម្រូវឱ្យគណបក្សនយោបាយអនុវត្តតាមការកំណត់ដែលមានដូចជាភ្ជាប់មកជាមួយនូវសេចក្ដីចម្លងលិខិតបញ្ជាក់ការចុះបញ្ជីគណបក្សនយោបាយនៅក្រសួងមហាផ្ទៃដែលអាចស្នើសុំការបញ្ជាក់ពីសេវាច្រកចេញចូលតែមួយនៅតាមរាជធានី ខេត្ត ក្រុង ស្រុក ខណ្ឌ ជាមួយនឹងបញ្ជីបេក្ខជនឈរឈ្មោះបោះឆ្នោតទាំងពេញសិទ្ធិ និងបញ្ជីឈ្មោះបម្រុង រួមទាំងបង់ប្រាក់តម្កល់ ១៥លានរៀលនៅធនាគារជាតិផងដែរ។
គួរឱ្យដឹងផងដែរថាការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នឹងត្រូវរៀបចំនៅថ្ងៃទី២៧ ខែកក្កដា ខាងមុខ៕
ព័ត៌មានជាច្រើនទៀតសម្រាប់អ្នក
