ភ្នំពេញ៖ ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ សម្តេចក្រឡាហោម ស ខេង បានអះអាងថា រាជរដ្ឋាភិបាលកម្ពុជាបានបេ្តជ្ញាចិត្តខ្ពស់ក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែនគ្រប់ប្រភេទ បទល្មើសការជួញដូរមនុស្ស និងគ្រឿងញៀន។

សម្តេចក្រឡាហោម បានថ្លែងបែបនេះក្នុងឱកាសទទួលជួបសម្តែងការគួរសមជាមួយឯកអគ្គរាជទូតអង់គ្លេសប្រចាំកម្ពុជា លោក Dominic Williams នាថ្ងៃទី០៥ ខែមេសា ឆ្នាំ២០២៣។

ឯកអគ្គរាជទូតអង់គ្លេសប្រចាំកម្ពុជា លោក Dominic Williams បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងដែលធ្វើឱ្យកម្ពុជាត្រូវបានដកចេញពីបញ្ជីប្រផេះនៃការលាងលុយកខ្វក់ ក្រោមការដឹកនាំផ្ទាល់របស់សម្តេចក្រឡាហោម ស ខេង។

លោក Dominic Williams បង្ហាញក្តីរីករាយដែលបានចូលរួមចំណែកជាមួយបណ្តាប្រទេសជាសមាជិកអាស៊ានក្នុងការប្រយុទ្ធប្រឆាំងឧក្រិដ្ឋកម្មឆ្លងដែន និងករណីជួញដូរមនុស្ស។ លោកបានចាត់ទុកថា សមិទ្ធផលការងារដែលលោកបានបញ្ជាក់នេះ គឺជាការបង្ហាញអំពីការប្ដេជ្ញាចិត្ត និងឆន្ទៈរបស់ចក្រភពអង់គ្លេស ក្នុងការរួមចំណែករក្សានូវសន្តិសុខល្អនៅក្នុងតំបន់។

សម្ដេចក្រឡាហោម បានលើកឡើងថា ការងារប្រយុទ្ធប្រឆាំងនឹងឧក្រិដ្ឋកម្មឆ្លងដែន និងបទល្មើសប្រឆាំងការជួញដូរមនុស្ស គឺកម្ពុជាមិនអាចធ្វើបានដោយឯកឯងនោះទេ ពោលគឺត្រូវមានកិច្ចសហប្រតិបត្តិការទាំងក្នុងកម្រិតតំបន់ និងសកលលោក ដើម្បីសម្រេចបាននូវកិច្ចស្រាវជ្រាវរកជនល្មើស និងមេក្លោង។

ក្នុងន័យនេះ សម្តេចក្រឡាហោម ចង់ឱ្យមានកិច្ចសហប្រតិបត្តិការឱ្យកាន់តែខ្លាំងក្លាបន្ថែមទៀតរវាងប្រទេសកម្ពុជា និងអង់គ្លេស ហើយសម្តេចបានស្នើឱ្យអង់គ្លេសចែករំលែកផ្លាស់ប្តូរបទពិសោធ អំពីការងារអនុវត្តល្អៗ ដើម្បីពង្រឹង និងលើកកម្ពស់សមត្ថភាពកងកម្លាំងអនុវត្តច្បាប់របស់កម្ពុជាឱ្យកាន់តែខ្លាំងក្លាថែមទៀតនៅក្នុងការងារប្រយុទ្ធប្រឆាំងឧក្រិដ្ឋកម្មឆ្លងដែន៕