ព្រះសីហនុ៖ នគរបាលឃាត់ខ្លួនជនសង្ស័យជាជនជាតិចិនចំនួន ៣នាក់ ពាក់ព័ន្ធនឹងបទល្មើស វាយកញ្ចក់រថយន្តលួចយកលុយ និងសម្ភារៈមានតម្លៃ ពីប្រជាពលរដ្ឋ និងលួចដោះយកផ្លាកលេខរថយន្ត។

ស្នងការនគរបាលខេត្តព្រះសីហនុ លោក ជួន ណារិន្ទ ឲ្យដឹងថា នាថ្ងៃត្រង់ថ្ងៃទី៣ ខែមេសា ឆ្នាំ២០២៣ នៅចំណុចតំបន់សេដ្ឋកិច្ចពិសេស កំពង់ផែក្រុងព្រះសីហនុ សង្កាត់៣ ក្រុង-ខេត្តព្រះសីហនុ ក្រុមជនសង្ស័យបានវាយកញ្ចក់រថយន្តលួចយកលុយ និងសម្ភារៈមានតម្លៃពីរថយន្តរបស់ប្រជាពលរដ្ឋ ដែលចតទុកនៅទីនោះ រួចលួចយកកាបូបលុយដែលនៅក្នុងរថយន្ត។ ក្នុងកាបូបនោះមានលុយខ្មែរចំនួន ២០ ០០០ ០០០៛ (ម្ភៃលានរៀល) និងលុយប្រទេសអាស៊ានចំរុះគ្រប់ប្រភេទមួយចំនួន រួមទាំងឯកសារ សម្ភារៈមួយចំនួនទៀត។

ក្រោយទទួលបានបណ្តឹងរបស់ជនរងគ្រោះ កម្លាំងនគរបាលធ្វើការស្រាវជ្រាវយ៉ាងយកចិត្តទុកដាក់ រហូតដល់ថ្ងៃទី៤ ខែមេសា ឆ្នាំ២០២៣ ទើបធ្វើការបង្ក្រាបបានទាំងស្រុង ដោយចាប់ឃាត់ខ្លួនបានជនសង្ស័យចំនួន ៣នាក់ ភេទប្រុស ជាជនជាតិចិន នៅចំណុច ភូមិ២ សង្កាត់៤ ក្រុង-ខេត្តព្រះសីហនុ។ វត្ថុតាងចាប់យកបានមានលុយខ្មែរចំនួន ២០ ០០០ ០០០៛ (ម្ភៃលានរៀល) និងលុយប្រទេសអាស៊ានចំរុះគ្រប់ប្រភេទមួយចំនួន រួមទាំងផ្លាកលេខរថយន្ត ២គូ (បាត់ដំបង 2D-9008 និង កែប 2B-2122) ដែលបានពីផលនៃអំពើចោរកម្ម ព្រមទាំង រថយន្ត ១គ្រឿង ម៉ាក TOYOTA CAMRY ស៊េរីឆ្នាំ២០០៧ ពណ៌ស ផ្លាកលេខ ភ្នំពេញ 2BH-1287 និងសម្ភារៈ វត្ថុតាងមួយចំនួនទៀត។

បន្ទាប់ពីធ្វើការសាកសួរ ជនសង្ស័យបានសារភាពថា ពួកគេធ្លាប់ធ្វើសកម្មភាពវាយកញ្ចក់រថយន្ត លួចយកកាបូបលុយសម្ភារៈនិងលួចដោះយកផ្លាកលេខរថយន្តសរុបចំនួន ៥លើក ក្នុងនោះមាន

វាយកញ្ចក់រថយន្ត លួចយកកាបូបលុយ និងសម្ភារៈចំនួន ៣លើក ដោយលើកទី១ នៅថ្ងៃទី១៩ ខែមីនា ឆ្នាំ២០២៣ នៅចំណុចផ្លូវឆ្នេរឯករាជ្យ ស្ថិតនៅ ភូមិ១ សង្កាត់៣ ក្រុង-ខេត្តព្រះសីហនុ លើកទី២ នៅថ្ងៃទី២ ខែមេសា ឆ្នាំ២០២៣ នៅចំណុចឆ្នេរអូរត្រេះ ស្ថិតនៅភូមិ៦ សង្កាត់៤ ក្រុង-ខេត្តព្រះសីហនុ និងលើកទី៣ នៅថ្ងៃទី៣ ខែមេសា ឆ្នាំ២០២៣ នៅចំណុចមុខតំបន់សេដ្ឋកិច្ចពិសេសកំពង់ផែ ស្ថិតនៅភូមិ៣ សង្កាត់៣ ក្រុង-ខេត្តព្រះសីហនុ។

ជាមួយគ្នានេះ ជនសង្ស័យបានលួចដោះយកផ្លាកលេខរថយន្តចំនួន ២លើក ដោយលើកទី១ នៅថ្ងៃទី២៤ ខែមីនា ឆ្នាំ២០២៣ លួចយកផ្លាកលេខរថយន្តមួយគូ (កែប 2B-2122) នៅចំណុចក្រុមទី៨ ភូមិ២ សង្កាត់៤ ក្រុង-ខេត្តព្រះសីហនុ និងលើកទី២ នៅអំឡុងចុងខែមីនា ឆ្នាំ២០២៣ លួចយកផ្លាកលេខរថយន្តមួយគូ (បាត់ដំបង 2D-9008) នៅខេត្តបាត់ដំបង។

បច្ចុប្បន្នជនសង្ស័យខាងលើ ការិយាល័យនគរបាលព្រហ្មទណ្ឌកម្រិតស្រាល កសាងសំណុំរឿងបញ្ជូនទៅសាលាដំបូងខេត្តព្រះសីហនុ ដើម្បីផ្តន្ទាទោសតាមផ្លូវច្បាប់៕