អន្តរជាតិ៖ ប្រទេសចិនបានព្រមានប្រធានសភាអាមេរិក លោក Kevin McCarthy កុំឱ្យប្រព្រឹត្តកំហុសឆ្គងសាជាថ្មីម្តងទៀតដូចពីអតីតកាល ជាពិសេសចំពោះជំនួបជាមួយប្រធានាធិបតីតៃវ៉ាន់ លោកស្រី Tsai Ing-wen ដោយបាននិយាយថាជំនួបនេះពុំបានជួយឱ្យល្អប្រសើរនូវសន្តិភាព និងស្ថិរភាពក្នុងតំបន់នោះទេ ប៉ុន្តែគ្រាន់តែនាំឱ្យមានការរួបរួមរបស់ប្រជាជនចិនចំពោះសត្រូវរួមតែប៉ុណ្ណោះ។
លោក Kevin McCarthy ដែលជាមន្រ្តីជាន់ខ្ពស់លំដាប់ទី៣ បន្ទាប់ពីប្រធានាធិបតី និងអនុប្រធានាធិបតី នឹងរៀបចំជំនួបនារដ្ឋកាលីហ្វ័រញ៉ានាថ្ងៃពុធនេះជាមួយលោកស្រី Tsai Ing-wen ក្នុងអំឡុងដែលលោកស្រីចូលចតនៅសហរដ្ឋអាមេរិក ដែលទង្វើនេះត្រូវបានចិនគំរាម ក៏ដូចជាព្រមានចាត់វិធានការសងសឹកចំពោះអាមេរិកប្រសិនបើមានជំនួបនេះកើតឡើង។
លោកស្រី Tsai បានហៅសកម្មភាពនេះថាគ្រាន់តែជាការប្តូរជើងហោះហើរធម្មតាប៉ុណ្ណោះ ចំពោះការចូលចតនៅរដ្ឋ Los Angeles ក្នុងដំណើរត្រឡប់ទៅកាន់តៃវ៉ាន់វិញ ក្រោយពីបញ្ចប់ដំណើរទស្សនកិច្ចនៅតំបន់អាមេរិកកណ្ដាល។ សហរដ្ឋអាមេរិកនិយាយថានេះគ្រាន់តែជាការផ្លាស់ជើងហោះហើរធម្មតាប៉ុណ្ណោះ ដែលមិនគប្បីចិនមានប្រតិកម្មខ្លាំងពេកនោះទេ។ ប៉ុន្តែស្ថានកុងស៊ុលរបស់ចិននៅទីក្រុង Los Angeles បាននិយាយថា វាជារឿងមិនពិត ក្នុងការអះអាងថាវាគ្រាន់តែជាការឆ្លងកាត់ ដែលបាននិយាយថាសកម្មភាពរបស់លោកស្រី Tsai ជាការបង្ហាញសកម្មភាពនយោបាយច្រើនជាង។
ស្ថានកុងស៊ុលបានបញ្ជាក់ក្នុងសេចក្តីប្រកាសព័ត៌មានថា មិនថាលោកស្រី Tsai ជួបជាមួយលោក McCarthy ក្នុងកម្រិតណានោះទេ ប៉ុន្តែកាយវិការនេះនឹងប៉ះពាល់យ៉ាងខ្លាំងដល់អារម្មណ៍របស់ប្រជាជនចិន និងជាការបញ្ជូនសញ្ញាមិនត្រឹមត្រូវមួយដល់កងកម្លាំងបំបែកខ្លួននៅតៃវ៉ាន់ ជាពិសេសគឺការប៉ះពាល់ដល់មូលដ្ឋានគ្រឹះនយោបាយនៃទំនាក់ទំនងចិន-អាមេរិក៕