ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រកាសថានឹងគ្មានការលក់សំបុត្រសម្រាប់ព្រឹត្តិការណ៍ស៊ីហ្គេមនោះទេ ទាំងបើក ទាំងបិទ និងការចូលមើលការប្រកួត។ ការលើកឡើងរបស់សម្ដេចតេជោ គឺឆ្លើយតបនឹងព័ត៌មានរសើបមួយដែលថាមានការលក់សំបុត្រសម្រាប់ពិធីបើកនិងបិទស៊ីហ្គេម។

ថ្លែងក្នុងសារសំឡេងពិសេសល្ងាចថ្ងៃទី៣០ ខែមីនា ឆ្នាំ២០២៣ សម្ដេចតេជោ ហ៊ុន សែន បានថ្លែងថា សម្ដេចមិននឹកស្មានថាមន្ត្រីស៊ីហ្គេមខ្វះការយកចិត្តទុកដាក់ដល់ថ្នាក់នេះ និងប្រកាសស្រាវជ្រាវរកអ្នកទទួលខុសត្រូវដែលបញ្ចេញព័ត៌មាននេះផងដែរ។

សម្ដេចតេជោថា៖ «ខ្ញុំមិននឹកស្មានថាមន្ត្រីរបស់យើងខ្វះការគិតគូរយកចិត្តទុកដាក់លើបញ្ហានេះ។ នេះជាការស្តីបន្ទោសរបស់ខ្ញុំលើកដំបូងតាំងពីការរៀបចំស៊ីហ្គេម ប៉ុន្តែនេះមិនមែនជាកំហុសរបស់សម្តេចពិជ័យសេនា ទៀ បាញ់ ឡើយ»។

សម្ដេចបញ្ជាក់ថា រដ្ឋាភិបាលចំណាយលុយរាប់រយលានដុល្លារសម្រាប់ព្រឹត្តិការណ៍នេះ មិនសមហេតុផលថា ចង់បានលុយពីពលរដ្ឋលើការលក់សំបុត្រនេះឡើយ៕