សៀមរាប៖ ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានសរសេរសារចូលរូមរំលែកទុក្ខដល់ក្រុមគ្រួសារដែលបានស្លាប់ដោយសារខ្យល់កន្ត្រាក់ធ្វើឱ្យបាក់ផ្ទាំងប៉ាណូកាត់ទទឹងផ្លូវសង្កត់ពីលើកាលពីល្ងាចនេះ។

លោក ហ៊ុន ម៉ានី បានរៀបរាប់ដូច្នេះថា៖«ក្នុងនាមជាពលរដ្ឋខ្មែរមួយរូប ខ្ញុំសូមចូលរួមសោកស្តាយចំពោះការខូចខាត និងសូមចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារជនរងគ្រោះ ព្រមទាំងសូមជូនពរដល់អ្នករងរបួស សូមឆ្លងផុតគ្រោះថ្នាក់»។

លោកសង្ឃឹមថា អាជ្ញាធរមូលដ្ឋាននឹងមានចំណាត់ការសមស្រប និងទាន់ពេលវេលាចំពោះបញ្ហាខាងលើ។ លោកថ្លែង៖«យើងនៅបន្តតាមដានយ៉ាងយកចិត្តទុកដាក់បំផុតនូវស្ថានភាពអាកាសធាតុ និងត្រៀមលក្ខណៈដើម្បីបញ្ចៀសហានិភ័យជាយថាហេតុណាមួយកើតឡើង»។

លោកបានអំពាវនាវពលរដ្ឋទាំងអស់បង្កើនការប្រុងប្រយ័ត្នលើសុវត្ថិភាពផ្ទាល់ខ្លួន និងអ្នកជាទីស្រលាញ់ ខណៈក្រសួងធនធានទឹក និងឧតុនិយម បានព្យាករថា នៅសប្តាហ៍ខាងមុខនេះ នៅតំបន់ខ្លះអាចនឹងមានភ្លៀងធ្លាក់លាយឡំនឹងផ្គរ រន្ទះ និងខ្យល់កន្ត្រាក់៕