ភ្នំពេញ៖ រដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង ស្នើលេខាធិការដ្ឋាន គ.ជ.ប.ជ ស្រង់គ្រប់ព័ត៌មានទាំងឡាយ ពាក់ព័ន្ធការជួញដូរមនុស្ស រាប់ទាំងព័ត៌មានចេញដោយក្រសួងការបរទេសអាមេរិក ដើម្បីរួមគ្នារិះរកគ្រប់មធ្យោបាយឆ្លើយតបឱ្យបានសមស្រប និងទាន់ពេលវេលាចំពោះបញ្ហាជួញដូរមនុស្សនេះ។

សម្ដេចក្រឡាហោមបែបនេះ ក្នុងពិធីផ្សព្វផ្សាយរបាយការណ៍ជាតិស្ដីពីការងារប្រយុទ្ធប្រឆាំងអំពើជួញដូរមនុស្សឆ្នាំ២០២២ និងទិសដៅការងារឆ្នាំ២០២៣ របស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស នៅថ្ងៃទី២៣ ខែមីនា ឆ្នាំ២០២៣ នៅវិទ្យាស្ថានជាតិអប់រំ។

សម្តេចក្រឡាហោមថ្លែងថាលោកនឹងពិនិត្យផ្ទៀងផ្ទាត់រាល់ព័ត៌មានទាំងឡាយដែលមានក្នុងរបាយការណ៍នោះ និង ភាពជាក់ស្តែងនៅកម្ពុជា ដោយសារព័ត៌មានខ្លះទាក់ទងនឹងការជួញដូរមនុស្សនៅកម្ពុជា ដូចនេះលោកនឹងរៀបចំក្រុមការងារដកស្រង់ព័ត៌មានទាំងនោះមកសិក្សាមើលជាបឋមសិន។

សម្តេចក្រឡាហោមមានប្រសាសន៍ថា៖ «យើងត្រូវរៀបចំចាត់តាំងឱ្យមានការសិក្សា ទៅលើរបាយការណ៍នេះ ហើយក៏មិនមែនតែផ្នែកជួញដូរមនុស្សទេ ផ្នែកដែលមានការពាក់ព័ន្ធផ្សេងទៀត ដើម្បីឆ្លើយតបឱ្យបានសមស្របនិងត្រឹមត្រូវ»។

ជាមួយគ្នានេះ សម្ដេចក្រឡាហោម ស ខេង បានបញ្ចាក់ថា ប្រសិនបើថ្នាក់ដឹកនាំ និងមន្រ្តីពាក់ព័ន្ធទាំងអស់ខិតខំអនុវត្តន៍ទៅតាមទិសដៅដែលបានដាក់ចេញ ប្រាកដណាស់ការប្រយុទ្ធប្រឆាំងអំពើជួញដូរមនុស្សនៅកម្ពុជា នឹងទទួលបានលទ្ធផលកាន់តែប្រសើរនៅឆ្នាំ២០២៣ នេះ។

សម្ដេចក្រឡាហោមបានគូសបញ្ជាក់ថា ថ្វីត្បិតលទ្ធផលការងារឆ្នាំ២០២២ មានភាពប្រសើរច្រើនធៀបនឹងឆ្នាំ២០២១ ប៉ុន្តែបញ្ហានេះនៅតែស្ថិតក្នុងស្ថានភាពប្រឈមដែលទាមទារការយកចិត្តទុកដាក់អនុវត្តន៍ជាប្រចាំ និងប្រកបដោយប្រសិទ្ធភាព ខណៈការងារនេះមិនទាន់បញ្ចប់ និងមិនទាន់មានការពេញចិត្តនៅឡើយទេ ពិសេសការងារបង្ក្រាប ការជួយសង្គ្រោះជនរងគ្រោះ ការចាប់ជនល្មើសមកផ្ដន្ទាទោស និងការបិទអាជីវកម្មពាក់ព័ន្ធនឹងអំពើជួញដូរមនុស្ស។

គួរឱ្យដឹងដែរថា គ.ជ.ប.ជ. បានធ្វើរបាយការណ៍អំពីការលទ្ធផលការងារប្រយុទ្ធប្រឆាំងអំពើជួញដូរមនុស្ស ក្នុងឆ្នាំ២០២២ ដោយសមត្ថកិច្ចបង្ក្រាបបាន១៦៦ករណី ធៀបនឹងឆ្នាំ២០២១ មាន ៣៥៩ករណី ឃាត់ខ្លួនជនសង្ស័យបញ្ជូនទៅសាលាដំបូងចំនួន ២០២នាក់ ក្នុងនោះជនសង្ស័យជាជនបរទេសចំនួន ៣៣នាក់។ សមត្ថកិច្ចបានសង្គ្រោះជនរងគ្រោះ ៣៥៨នាក់ ក្នុងនោះស្រីចំនួន ២៦៥នាក់ ដោយប្រគល់ជូនមន្ទីរសង្គមកិច្ចនិងក្រុមគ្រួសារ៕