ចិន៖ ប្រធានាធិបតីចិន លោក ស៊ី ជីនពីង នៅថ្ងៃចន្ទនេះបានចាប់ផ្តើមដំណើរទស្សនកិច្ចផ្លូវរដ្ឋរបស់លោកទៅកាន់ប្រទេសរុស្សី ដែលដំណើរទស្សនកិច្ចនេះត្រូវបានរដ្ឋាភិបាលទីក្រុងប៉េកាំងហៅថាជាដំណើរទស្សនកិច្ចដើម្បីសន្តិភាព ខណៈដែលខ្លួនព្យាយាមដើរតួជាអ្នកសម្រុះសម្រួលក្នុងសង្រ្គាមលោក Vladimir Putin នៅអ៊ុយក្រែន។
ទស្សនកិច្ចរបស់លោក ស៊ី ជីនពីង រយៈពេល ៣ថ្ងៃនេះ គឺជាលើកដំបូងនៃដំណើរទស្សនកិច្ចទៅកាន់ទឹកដីសម្ព័ន្ធមិត្តរុស្សីជាលើកដំបូងក្នុងរយៈពេល ៤ឆ្នាំ ហើយត្រូវបានទីក្រុងម៉ូស្គូពណ៌នាថាបានឈានជើងក្នុងយុគសម័យថ្មីក្នុងទំនាក់ទំនងការទូតរវាងប្រទេសទាំងពីរ។ ដំណើរទស្សនកិច្ចរបស់ចិនពេលនេះចំពេលដែលរុស្សីកំពុងស្ថិតក្នុងភាពឯកោ ក្រោយពីវាយប្រហារទៅប្រទេសក្បែរខាងរបស់ខ្លួនគឺអ៊ុយក្រែន ដែលការពារនិងឈរពីក្រោយដោយសហភាពអឺរ៉ុប។
ដំណើរទស្សនកិច្ចនេះនឹងត្រូវបានតាមដានយ៉ាងដិតដល់ ជាពិសេសសម្រាប់សញ្ញាដែលលោក ស៊ី អាចនឹងជំរុញឲ្យមានកិច្ចចរចាសន្តិភាពរវាងទីក្រុងម៉ូស្គូ និងទីក្រុងគៀវ។ កាសែត Wall Street Journal បានរាយការណ៍ថា លោក ស៊ី ជីនពីង ក៏អាចគ្រោងនឹងហៅទូរស័ព្ទលើកដំបូងជាមួយប្រធានាធិបតីអ៊ុយក្រែនលោក វ្លូឌីមៀរ ហ្សេឡេនស្គី ចាប់តាំងពីសង្គ្រាមរវាងរុស្សី និងអ៊ុយក្រែនបានផ្ទុះឡើង។ បើតាមប្រភពស្និតស្នាលរបស់លោកពូទីនបានថ្លែងថា មេដឹកនាំកំពូលនៃប្រទេសទាំងពីរ ក៏គ្រោងនឹងមានកិច្ចប្រជុំ និងការពិសារអាហារពេលល្ងាច "ក្រៅផ្លូវការ" មួយទល់មួយនៅយប់ថ្ងៃចន្ទ មុនពេលបើកការចរចាជាផ្លូវការនៅថ្ងៃអង្គារ។
វិមានក្រឹមឡាំងបានបញ្ជាក់ថា ប្រធានាធិបតីទាំងពីរនឹងចុះហត្ថលេខាលើកិច្ចព្រមព្រៀងមួយស្តីពី ការពង្រឹងភាពជាដៃគូគ្រប់ជ្រុងជ្រោយនៃប្រទេសទាំងពីរ និងទំនាក់ទំនងយុទ្ធសាស្ត្រនៃយុគសម័យថ្មី ក៏ដូចជាសេចក្តីប្រកាសរួមស្តីពីកិច្ចសហប្រតិបត្តិការសេដ្ឋកិច្ចរុស្ស៊ី-ចិន រហូតដល់ឆ្នាំ២០៣០។ ថ្មីៗនេះ ក្រោយពីការសម្រុះសម្រួល និងការផ្សះផ្សាការទូតដ៏គួរឱ្យភ្ញាក់ផ្អើលរវាងគូប្រជែងនៅមជ្ឈិមបូព៌ាគឺប្រទេសអារ៉ាប៊ីសាអូឌីត និងអ៊ីរ៉ង់ បច្ចុប្បន្ននេះទីក្រុងប៉េកាំងហាក់កំពុងចង់ដាក់ខ្លួនជាអ្នកបង្កើតសន្តិភាពលើឆាកអន្តរជាតិ៕
