រុស្សី៖ ប្រធានាធិបតីស៊ីរី លោក Bashar al-Assad បានធ្វើដំណើរមកដល់ប្រទេសរុស្សី នៅថ្ងៃអង្គារ ទី១៤ម្សិលមិញនេះ ដែលជាដំណើរទស្សនកិច្ចជាផ្លូវការលើកដំបូងបង្អស់របស់លោកនៅក្រៅតំបន់មជ្ឈិមបូព៌ា ចាប់តាំងពីហេតុការណ៍រញ្ជួយដីដែលបានវាយប្រហារប្រទេសស៊ីរីកាលពីខែមុន។ នេះបើយោងតាមសេចក្តីជូនដំណឹងរបស់ការិយាល័យប្រធានាធិបតីតាមរយៈប្រព័ន្ធ Telegram។
សេចក្តីជូនដំណឹងនេះក៏បានបញ្ជាក់ផងដែរ លោក Assad រួមជាមួយនឹងប្រតិភូគណៈរដ្ឋមន្រ្តីរបស់លោកនឹងអាចមានជំនួបពិភាក្សាការងារជាមួយប្រធានាធិបតីរុស្សី លោក Vladimir Putin ក្នុងដំណើរទស្សនកិច្ចនេះ។
ដោយឡែក វិមានក្រឹមឡាំងបានចេញសេចក្តីប្រកាសព័ត៌មានថា ជំនួបរវាងមេដឹកនាំប្រទេសទាំងពីរនឹងពិភាក្សាផ្តោតសំខាន់ទៅលើអំពីកិច្ចសហប្រតិបត្តិការក្នុងវិស័យនយោបាយ ពាណិជ្ជកម្ម និងមនុស្សធម៌ ក៏ដូចជាការរំពឹងទុកសម្រាប់ការដោះស្រាយជារួមនៃស្ថានភាពនៅក្នុង និងជុំវិញប្រទេសស៊ីរី។ ប្រទេសរុស្ស៊ីធ្លាប់បានចាប់ផ្តើមយុទ្ធនាការយោធានៅក្នុងប្រទេសស៊ីរីកាលពីឆ្នាំ២០១៥ ដែលជាការគាំទ្រដល់លោកប្រធានាធិបតី Assad ក្នុងសង្គ្រាមស៊ីវិលនៅស៊ីរី ជាមួយនឹងការទម្លាក់គ្រាប់បែកពីលើអាកាសដ៏ធំទៅលើតំបន់កាន់កាប់ដោយក្រុមប្រឆាំង។
ចាប់តាំងពីពេលនោះមក ទីក្រុងមូស្គូបានពង្រីកទីតាំងយោធារបស់ខ្លួននៅក្នុងប្រទេសជាមួយនឹងមូលដ្ឋានទ័ពអាកាសអចិន្ត្រៃយ៍នៅ Hmeymim ក្នុងខេត្ត Latakia របស់ប្រទេសស៊ីរី។ ក្រៅពីនេះ មូលដ្ឋានទ័ពជើងទឹក Tartous របស់រុស្ស៊ីនៅក្នុងទីក្រុងឆ្នេរសមុទ្រមេឌីទែរ៉ាណេ គឺជាកំពង់ផែទឹកក្តៅអចិន្ត្រៃយ៍តែមួយគត់របស់កងទ័ពជើងទឹករុស្ស៊ីនៅខាងក្រៅអតីតសហភាពសូវៀត។ គួរបញ្ជាក់ថា ដំណើរទស្សនកិច្ចនេះគឺស្របនឹងខួបគម្រប់១២ឆ្នាំនៃការបះបោរនៅស៊ីរីដែលបានចាប់ផ្តើមដោយបាតុកម្មដោយសន្តិវិធីមួយនៅក្នុងខែមីនា ឆ្នាំ២០១១៕
