ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានបង្ហោះវីដេអូនៅលើទំព័រតេឡេក្រាមកាលពីយប់ថ្ងៃទី១៤ ខែមីនា ឆ្នាំ២០២៣ ដោយបញ្ជាក់ថា នេះជាវីដេអូនៃការចរចាលើកទី២ រវាងសម្តេចតេជោ និងសម្តេចព្រះ នរោត្តម សីហនុ នៅសាំងសែមាំងអង់លេ ប្រទេសបារំាងថ្ងៃទី២០-២១ ខែមីនា ឆ្នាំ១៩៨៨។

សម្តេចតេជោ បានលើកឡើងថា កាលចរចានៅឆ្នាំ១៩៨៨នោះ សម្តេចតេជោបានស្នើឱ្យបង្កើតក្រុមប្រឹក្សាបង្រួបបង្រួមជាតិជាន់ខ្ពស់ដែលមានសម្តេចព្រះនរោតម្តសីហនុជាព្រះប្រធាននិងមានអនុប្រធាន៣រូប។ គ្រានោះសម្តេចព្រះ នរោត្តម សីហនុ ទ្រង់ក៏បានស្នើបង្កើតរដ្ឋាភិបាលចតុភាគីផងដែរ។

នាយករដ្ឋមន្ត្រីកម្ពុជាបានរៀបរាប់ដូច្នេះថា៖ «ជំហរភាគីទាំងពីរនៅខុសគ្នាឆ្ងាយតែខ្ញុំជាមួយសម្តេចឪនៅតែបន្តការចរចាបន្តទៀតរហូតសម្រេចបាននូវការបង្កើតឡើងនូវក្រុមប្រឹក្សាជាតិជាន់ខ្ពស់តាមរូបមន្ត៦ បូក៦ ឬ៦ បូក២ បូក២ បូក២ ដែលចុះហត្ថលេខានៅបាងកកនិងតូក្យូដើមឆ្នាំ១៩៩០ និងរៀបចំសមាសភាពនៅហ្សាកាតាត្រីមាសទី៣ ឆ្នាំ១៩៩០»៕