ភ្នំពេញ៖ អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានប្រកាសបិទចរាចរណ៍ចំពោះមធ្យោយបាយគ្រប់ប្រភេទតាមផ្លូវទឹកត្រង់ចំណុចស្ពានព្រែកព្នៅ ខណ្ឌព្រែកព្នៅ ជាបណ្តោះអាសន្នសិន ពីព្រោះរដ្ឋាករទឹកស្វយ័តក្រុងភ្នំពេញត្រូវតភ្ជាប់ និងដាក់បំពង់មេនាំទឹកស្អាតនៅបាតទន្លេសាបពីត្រើយខាងកើតស្ពានព្រែកព្នៅ ទៅត្រើយខាងលិចដើម្បីផ្គត់ផ្គង់ទឹកស្អាតដល់ពលរដ្ឋក្នុងរាជធានីភ្នំពេញ និងក្រុងតាខ្មៅ។
បើតាមសេចក្តីជូនដំណឹងចេញផ្សាយនៅថ្ងៃទី១៤ ខែមីនា អាជ្ញាធរនឹងបិទចរាចរណ៍តាមផ្លូវទឹកត្រង់ស្ពានព្រែកព្នៅរយៈពេល ២ថ្ងៃ ចាប់ពីម៉ោង ៦ព្រឹក ថ្ងៃទី១៥ ខែមីនា ឆ្នាំ២០២៣ រហូតដល់បិទបញ្ចប់ការងារនៅម៉ោង៦ និង០០នាទី ល្ងាចថ្ងៃទី១៦ ខែមីនា ឆ្នាំ២០២៣។
អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានប្រកាសផ្អាកចរាចរណ៍តាមផ្លូវទឹកនេះដើម្បីគ្រប់គ្រងការងារនេះឱ្យមានប្រសិទ្ធភាព និងបញ្ចៀសគ្រោះថ្នាក់ដែលអាចកើតឡើងជាយថាហេតុ៕
