អ៉ីតាលី៖ ក្របខណ្ឌលីគអ៉ីតាលី Serie A បានបញ្ជាក់ថា ការប្រកួតពានរង្វាន់ Italian Supercup ទំនងជានឹងធ្វើឡើងនៅប្រទេសអារ៉ាប៊ីសាអូឌីតនារដូវកាលក្រោយ ក្រោមទម្រង់ជាការប្រកួតប្រជែងក្រុមចំនួន ៤ ដែលជាផ្នែកមួយនៃកិច្ចព្រមព្រៀងថ្មី ដែលមានន័យថាការប្រកួតពាន Italian Supercup ចំនួន ៤ ក្នុងចំណោម ៦រដូវកាលចុងក្រោយនឹងធ្វើឡើងនៅប្រទេសក្នុងតំបន់ឈូងសមុទ្រអារ៉ាប់មួយនេះ។

នាយកក្របខណ្ឌ Serie A លោក Lorenzo Casini បានប្រាប់អ្នកសារព័ត៌មានថា លីគអ៉ីតាលីនឹងធ្វើការសម្រេចពីមួយឆ្នាំទៅមួយឆ្នាំថាតើការប្រកួតនឹងត្រូវធ្វើឡើងដោយរូបមន្តមាន ៤ក្រុមចូលរួម ឬជាការប្រកួត Final តែម្តងរវាងជើងឯក Serie A និង Italia Cup ដូចអ្វីដែលកំពុងរៀបចំ និងដំណើរការនាពេលបច្ចុប្បន្ន។

លីគកំពូលបាល់ទាត់អ៉ីតាលីបានស្ថិតក្នុងកិច្ចព្រមព្រៀងជាមួយប្រទេសអារ៉ាប៊ីសាអូឌីតទៅលើការប្រកួតពានរង្វាន់ Italian Supercup តាំងពីឆ្នាំ២០១៨។ ការប្រកួត ៣លើក ក្នុងចំណោម ៥រដូវកាលចុងក្រោយបានធ្វើឡើងនៅក្នុងប្រទេសអារ៉ាប៊ីសាអីឌីត ក្នងកិច្ចព្រមព្រៀងដែលមានតម្លៃជាទឹកប្រាក់ ២១លានអឺរ៉ូ។ 

មន្រ្តីនៃក្របខណ្ឌលីគអ៉ីតាលីបានបញ្ជាក់ថា ចំពោះកិច្ចព្រមព្រៀងថ្មីនេះនឹងនាំឱ្យអារ៉ាប៊ីសាអូឌីតចាយលុយ ២៣លានអឺរ៉ូសម្រាប់ការទទួលរៀបចំធ្វើជាម្ចាស់ផ្ទះពាន Italian Supercup  ដែលមានរូបមន្តប្រកួត ៤ក្រុម និងចំណាយ ១២លានអឺរ៉ូប្រសិនបើការរៀបចំធ្វើឡើងតែមួយប្រកួត ពោលគឺរវាងជើងឯកលីគកំពូល Serie A និងជើងឯកពាន Italian Cup៕