អាល្លឺម៉ង់៖ ខ្សែការពារក្លិប  Werder Bremen កីឡាករ Mitchell Weiser កាន់តែខិតកៀកដល់ការបង្ហាញខ្លួនឱ្យក្រុមជម្រើសជាតិអាល់ហ្សេរីជាផ្លូវការ។ នេះបើផ្អែកតាមការរាយការណ៍ដោយប្រភពពីទស្សនាវដ្តីកីឡាអាល្លឺម៉ង់។ យ៉ាងណាក្តី អ្នកនាំពាក្យផ្នែកប្រព័ន្ធផ្សព្វផ្សាយរបស់សហព័ន្ធបាល់ទាត់អាល់ហ្សេរី បដិសេធមិនផ្តល់ការអធិប្បាយណាមួយជុំវិញបញ្ហានេះឡើយ។ 

 អ្នកនាំពាក្យក្រុមអាល់ហ្សេរី លោក Saleh Bey Abboud និយាយថា៖ "យើងឱ្យគ្រប់គ្រងគឺជាការសម្ងាត់និងអាចទុកចិត្តបាន ដែលយើងមិននិយាយអ្វីពាក់ព័ន្ធនឹងបញ្ហាកីឡាករឡើយ ដោយយើងផ្តល់សិទ្ធិឱ្យគ្រូបង្វឹក Djamel Belmadi ជាអ្នករ៉ាប់រងការងារនេះ និងបង្ហាញសមាសភាពកីឡាកររបស់ក្រុម"។ ផ្អែកតាមប្រភពទស្សនាវដ្តីដដែលបញ្ជាក់ថា កីឡាករ Weiser អាចបង្ហាញខ្លួនក្នុងនាមជាកីឡាកររបស់អាល់ហ្សេរី ដោយសារតែម្តាយរបស់គេមានឈាមជ័រជាជនជាតិអាល់ហ្សេរី។ 

គួរបញ្ជាក់ថា Mitchell Weiser ធ្លាប់លេងឱ្យឈុតយុវជនអាល្លឺម៉ង់ប្រហែល ៤០​ប្រកួត និងឈ្នះពានជើងឯកទ្វីបអឺរ៉ុបអាយុក្រោម ២១ឆ្នាំម្តង កាលពីឆ្នាំ២០១៧ ប៉ុន្តែមិនត្រូវបានកោះហៅឱ្យចូលរួមក្រុមធំម្តងណាឡើយ។ សហព័ន្ធបាល់ទាត់អាល់ហ្សេរី បានធ្វើការទាក់ទងកីឡាកររូបនេះរួចហើយ ប៉ុន្តែគេអាចនឹងចូលរួមជាមួយក្រុមជម្រើសជាតិទ្វីបអាហ្វ្រិកនេះបានឬយ៉ាងណា អាស្រ័យលើការសម្រេចចិត្តរបស់លោក Djamel Belmadi ក៏ដូចជាការបំពេញបែបបទចូលសញ្ជាតិរបស់កីឡាកររូបនេះបានលឿនកម្រិតណា។ 

លោក Djamel Belmadi ជាគ្រូបង្វឹកជោគជ័យម្នាក់របស់អាល់ហ្សេរី ដោយដឹកនាំក្រុមឈ្នះពានជើងឯកទ្វីបអាហ្រ្វិកនៅឆ្នាំ២០១៩ ប៉ុន្តែធ្លាក់ត្រឹមជុំទី១ កាលពីឆ្នាំមុននៅទឹកដីកាមេរ៉ូន និងមិនបានបង្ហាញខ្លួននៅក្នុងព្រឹត្តិការណ៍ FIFA World Cup ឆ្នាំ២០២២ ក្រោយពេលដែលធ្លាក់ក្រោមថ្វីជើងក្រុមជម្រើសជាតិកាមេរ៉ូន។ យ៉ាងណាក្តី លោកបានសន្យាថានឹងរៀបចំក្រុមឡើងវិញ សម្រាប់ការប្រជែងពាន African Cup of Nation ឆ្នាំ២០២៤ នៅប្រទេសកូឌីវ័រ ព្រមជាមួយការប្រជែងកៅអី World Cup នៅឆ្នាំ២០២៦ ផងដែរ៕