បន្ទាយមានជ័យ៖ ស្ត្រីពលករខ្មែរម្នាក់ដែលត្រូវបានជនមិនស្គាល់អត្តសញ្ញាណប្លន់សម្លាប់កាលពីថ្ងៃទី២៨ ខែកុម្ភៈ ឆ្នាំ២០២៣ នៅក្នុងព្រៃចម្ការមីន ច្រករបៀងនៃព្រំដែន ក្នុងភូមិសាស្រ្តស្រុកអូរជ្រៅ ខេត្តបន្ទាយមានជ័យ ពេលនេះសមត្ថកិច្ចចាប់បានជនដៃដល់ដែលសម្លាប់ស្ត្រីរូបនោះហើយនៅថ្ងៃទី០៥ ខែមីនា ឆ្នាំ២០២៣ នៅក្នុងទឹកដីថៃ។

ស្នងការនៃស្នងការនគរបាលខេត្តបន្ទាយមានជ័យ លោកឧត្តមសេនីយ៍ទោ សិទ្ធិ ឡោះ បានបញ្ជាក់ឱ្យដឹងថា ជនដៃដល់ដែលប្លន់សម្លាប់ស្ត្រីពលករខ្មែរ គឺជាជនជាតិថៃដែលជាមេខ្យល់នាំពលករខ្មែរឆ្លងដែនខុសច្បាប់។

បើតាមលោកឧត្តមសេនីយ៍ទោ សិទ្ធិ ឡោះ ការឈានដល់ការចាប់ខ្លូនជនដៃដល់បាន គឺមានការសហការគ្នារវាងសមត្ថកិច្ចកម្ពុជា និងថៃ ទើបអាចស្រាវជ្រាវរហូតដល់អាចតាមចាប់ខ្លួនជនដៃដល់បានសម្រេច។

ស្នងការរងទទួលផែនការងារព្រំដែនខេត្តបន្ទាយមានជ័យ លោកឧត្តមសេនីយ៍ត្រី អ៊ុ សុផល បានបញ្ជាក់ថា សមត្ថកិច្ចទាំងពីរបាន និងកំពុងសម្របសម្រួលនិតិវិធីក្នុងការសួរចម្លើយជនសង្ស័យ និងនីតិវិធីបញ្ជូនមកប្រទេសកម្ពុជា។

ជនសង្ស័យមានឈ្មោះ ហុង ខាវសិរីវេត (ហៅហុង) ភេទប្រុស អាយុ ៥១ឆ្នាំ ជាមេខ្យល់ជនជាតិថៃ រស់នៅភូមិណាំគៀង ឃុំណូនម៉ាក់មុន ស្រុកគោកធ្យូងខេត្តស្រះកែវ ប្រទេសថៃ៕