អន្តរជាតិ៖ ប្រធានសមាគមប្រដាល់អន្តរជាតិ (IBA) លោក Umar Kremlev បាននិយាយកាលពីថ្ងៃសុក្រថា អត្តពលិករុស្សី និងបេឡារុស្សគប្បីអាចចូលរួមប្រកួតប្រជែងក្រោមទង់ជាតិរបស់ខ្លួនបាន។ គួរបញ្ជាក់ថា ស្ថាប័នប្រដាល់ IBA បានប្រកាសដកនូវបំរាមរបស់ខ្លួនទៅលើរុស្សី​ និងបេឡារុស្សកាលពីខែតុលាកន្លងទៅ ដែលប្រឆាំងទៅនឹងការណែនាំពីសំណាក់គណៈកម្មាធិការអូឡាំពិកអន្តរជាតិ (IOC) ក្រោយបំរាមត្រូវបានដាក់បន្ទាប់ពីរុស្សីបានធ្វើការឈ្លានពានទៅលើប្រទេសអ៊ុយក្រែនកាលពីខែកុម្ភៈ ឆ្នាំ២០២២កន្លងទៅ។ 

លោក Kremlev បានប្រាប់មកកាន់ Reuter ថា៖ "ពួកគេគួរតែចូលរួមប្រកួត ហើយវាមិនគួរជាប្រភេទនៃឯកសិទ្ធិមួយចំនួនដែលត្រូវបានផ្តល់ឱ្យអាស្រ័យលើកាលៈទេសៈនោះទេ។ សមាគមអន្តរជាតិនីមួយៗគួរតែមានស្តង់ដារទាំងនេះ ដែលយើងក្នុងនាមជាសមាគមអន្តរជាតិគួរតែការពារទៅលើអត្តពលិកគ្រប់ៗរូប។ ម្យ៉ាងទៀត យើងគប្បីយល់ថារឿងដែលសំខាន់បំផុតសម្រាប់អត្តពលិកក្នុងការប្រកួតគឺការបន្លឺឡើងនូវភ្លេងជាតិ និងទង់ជាតិត្រូវបានបង្ហូតឡើង"។ 

ថ្មីៗនេះ IBA បានបើកដំណើរការនីតិវិធីវិន័យប្រឆាំងនឹងប្រទេសចំនួន ១១ជុំវិញការគ្រោងធ្វើពហិការមិនចូលរួមការប្រកួតជើងឯកពិភពលោក ដោយសារការដាក់បញ្ចូលអ្នកប្រដាល់រុស្ស៊ី និងបេឡារុស្សឱ្យចូលប្រកួតក្នុងព្រឹត្តិការណ៍នោះ។ សកម្មភាពវិន័យរបស់លោក Kremlev គឺសំដៅលើនាយកប្រតិបត្តិប្រដាល់របស់សហរដ្ឋអាមេរិក លោក Mike McAtee ប្រធានប្រដាល់កាណាដា លោក Ryan O'Shea ប្រធានសមាគមប្រដាល់ឆេក លោក Marek Simak ប្រធានសមាគមប្រដាល់ស៊ុយអែត លោក Per-Axel Sjoholm និងលោក Steve Hartley ប្រធានសមាគមប្រដាល់នូវែលសេឡង់។

កាល​ពី​ឆ្នាំ​មុន IOC បាន​លើក​ឡើង​ពី​លទ្ធភាព​នៃ​ការ​មិន​រាប់​បញ្ចូល​វិញ្ញាសា​ប្រដាល់​ទៅក្នុង​ព្រឹត្តិការណ៍អូឡាំពិក Paris ឆ្នាំ២០២៤។ IBA ត្រូវបានដកចេញម្តងហើយពីព្រឹត្តិការណ៍កីឡាអូឡាំពិកទីក្រុងតូក្យូឆ្នាំ២០២០ ហើយកីឡាប្រដាល់ក៏ទំនងជាមិនមាននៅក្នុងអូឡាំពិកទីក្រុង Los Angeles ឆ្នាំ២០២៨ដូចគ្នា ដោយរង់ចាំការកែទម្រង់ដែលកំណត់ដោយ IOC ជាមុនសិន៕