ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ជាឱ្យមន្ត្រីដែលចាប់សត្វក្ងោកចំនួន ៦ក្បាលពីពលរដ្ឋរស់នៅស្រុកបរិបូណ៌ ខេត្តកំពង់ឆ្នាំង ឆាប់យកក្ងោកទៅឱ្យពលរដ្ឋវិញនៅថ្ងៃនេះ ដោយថា សម្ដេចមិនយល់ស្របនឹងទង្វើរបែបនេះទេ។

ក្នុងសារសំឡេងក្នុង Channel Telegram នៅថ្ងៃអង្គារ ទី២៨នេះ សម្ដេចតេជោ ហ៊ុន សែន បានថ្លែងថាគួរណាស់តែជួយតែលើកទឹកចិត្តអ្នកចិញ្ចឹមសត្វដែលជិតផុតពូជទាំងនេះ។ សម្ដេចបានបញ្ជាឱ្យយកសត្វក្ងោកទៅឱ្យម្ចាស់សត្វវិញនៅថ្ងៃនេះ។

សម្ដេចថា៖ «ទទួលបានបទបញ្ជានេះហើយមន្ត្រីពាក់ព័ន្ធក្នុងក្រសួងកសិកម្ម រុក្ខប្រមាញ់ និងនេសាទ ត្រូវដឹកជញ្ជូនសត្វនេះទៅដល់ផ្ទះវិញឱ្យបានឆាប់តាមដែលអាចធ្វើទៅបានគឺធ្វើឱ្យបានឆាប់នៅថ្ងៃទី២៨ នេះតែម្ដងទទួលបានបទបញ្ជានេះគឺសូមអនុវត្តភ្លាមដោយគ្មានការរង់ចាំ។ នេះជាបញ្ជារបស់នាយករដ្ឋមន្ត្រីដែលមិនអាចមិនអនុវត្តបានឡើយរឿងដទៃទៀតទុកនិយាយនៅពេលក្រោយ»។

សម្ដេចតេជោក៏បានស្នើឱ្យធ្វើវិសោធនកម្មច្បាប់កែប្រែត្រង់ចំណុចណាដែលចែងឱ្យចាប់យកសត្វចិញ្ចឹមរបស់ប្រជាពលរដ្ឋចេញពីការអនុវត្តផងដែរ។

សម្ដេចតេជោក៏បញ្ជាក់ផងដែរថា នៅផ្ទះសម្ដេចក៏ធ្លាប់បានចិញ្ចឹមសត្វក្ងោកផងដែរ៕