ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានអំពាវកុំឱ្យមានការលាបព័ណ៌ដល់អ្នកដែលចុះចូលជាមួយរដ្ឋាភិបាលថាជាអ្នកលក់ក្បាល ឬជេរប្រទេចគ្នាឱ្យសោះ ព្រោះថាក្នុងប្រទេសប្រជាធិបតេយ្យប្រជាពលរដ្ឋគ្រប់រូបមានសិទ្ធិក្នុងការជ្រើសរើសអ្នកណាមួយដែលខ្លួនពេញចិត្ត។

ថ្លែងក្នុងទិវាជាតិទីក្រុងស្អាតលើកទី១១ នៅរសៀលថ្ងៃទី២៧ ខែកុម្ភៈ ឆ្នាំ២០២៣ នេះនៅរាជធានីភ្នំពេញ សម្ដេចតេជោ ហ៊ុន សែន បានថ្លែងដោយហួសចិត្តថា អ្នកដែលលាបព័ណ៌គេ និងជេរប្រទេចគេទាំងនោះគឺសុទ្ធតែហៅខ្លួនថាជាអ្នកប្រជាធិបតេយ្យ និងថាដោយសារតែអ្នកទាំងនោះអន់ហើយទើបគ្មានអ្នកណានៅជាមួយនោះហើយសុំកុំលាបព័ណ៌គេ។

សម្ដេចតេជោថា៖ «ខ្លួនឯងវាអន់គ្រប់គ្រងមិនកើតគិតតែពីរឿងប្រឆាំងៗគ្រប់រឿងតែម្ដង»។

សម្ដេចតេជោថ្លែងបែបនេះបន្ទាប់ពីមានចលនារបស់ក្រុមប្រឆាំងធ្វើការវាយប្រហារលើអ្នកដែលចូលរួមជាមួយរដ្ឋាភិបាលនៅប៉ុន្មានថ្ងៃមកនេះ ខណៈសម្ដេចថាពួកគេទាំងនោះនៅក្មេងដែលមានអនាគតវែងឆ្ងាយនិងព្រមានថាប្រយ័ត្នអ្នកចុះចូលទាំងនោះតបទៅវិញ៕