ភ្នំពេញ៖ ភាពយន្តភាគរឿងអប្សរាមហាអង្គរ ដែលជាខ្សែភាពយន្ត ត្រូវបាននិពន្ធឡើងនៅតាមលំនាំប្រវត្តិសាស្ត្រខ្មែរ នៃអាណាចក្រដ៏សែនរុងរឿងនាចុងសតវត្សទី១២ និងសតវត្សទី១៣ ហើយនឹងរម្លឹកទៅដល់សម័យកាលដ៏រុងរឿងនៃប្រវត្តិសាស្រ្តកម្ពុជា។
រឿងបុរាណខ្មែរ «អប្សរាមហាអង្គរ» ត្រូវបានធ្វើពិធីក្រុងពាលីបើកការថតកាលពីថ្ងៃទី២២ ខែកុម្ភៈ ឆ្នាំ២០២៣ កន្លងទៅ។
ភាពយន្តភាគរឿង អប្សរាមហាអង្គរ មានតួសម្តែងតំណាងអង្គក្សត្រ និងតួអង្គផ្សេងៗទៀតសុទ្ធសឹងតែជាតារាសម្តែងល្បីៗ ព្រមទាំងបវរកញ្ញាកម្ពុជាជាច្រើនរូបផងដែរ។
អ្វីដែលគួរឱ្យកត់សម្គាល់នោះគឺ គ្រឿងតែងនិងឈុតបុរាណដែលតួសម្តែងស្រីត្រូវគ្រងគឺដកស្រង់ចេញពីអប្សរាដែលបានឆ្លាក់នៅលើជញ្ជាំងប្រាសាទខ្មែរ ដែលអាចរម្លឹកទៅដល់សម័យកាលដ៏រុងរឿងនៃប្រវត្តិសាស្ត្រកម្ពុជា គឺសម័យអង្គរ តាមរយៈភាពយន្តរឿងអប្សរាមហាអង្គរនេះ។
គួរឱ្យដឹងដែរថាក្បាច់គុនល្បុក្កតោ របាំ អប្សរា ដែលសុទ្ធតែជាបេតិកភណ្ឌវប្បធម៌អរូបីមនុស្សជាតិ របស់អង្គការយូណេស្កូ នឹងត្រូវបានយកមករំលេចនៅក្នុងឈុតឆាកដ៏អស្ចារ្យនេះផងដែរ បើតាមការបញ្ជាក់ពីអ្នកដឹកនាំសម្តែងលោក ហ្វៃ សំអាង៕
