ភ្នំពេញ៖ រដ្ឋសភាកម្ពុជាបានប្រកាសថ្កោលទោសដ៏ធ្ងន់ធ្ងរចំពោះ ទណ្ឌិត សម រង្ស៊ី ដែលជាជនក្បត់ជាតិ ដែលបានប្រមាថដល់ព្រះមហាក្សត្រខ្មែរជាច្រើនលើកជាច្រើនសារ។

រដ្ឋសភាកម្ពុជា សូមទាមទារដល់ស្ថាប័ន និងអាជ្ញាធរមានសមត្ថកិច្ចទាំងអស់មានអយ្យការអមតុលាការគ្រប់ជាន់ថ្នាក់ ត្រូវចាត់វិធានការតាមផ្លូវច្បាប់ និងប្ដឹងទៅតុលាការ ដើម្បីចាប់ជនក្បត់ជាតិ សម រង្ស៊ី មកផ្តន្ទាទោសតាមច្បាប់ជាធរមាន។

រដ្ឋសភា ប្ដេជ្ញាបន្តដង្ហែតាមអង្គព្រះមហាក្សត្រដោយឥតងាករ និងប្តេជ្ញាបន្តការពាររដ្ឋធម្មនុញ្ញ ការពាររាជរដ្ឋាភិបាលស្របច្បាប់ ការពាររាជបល្ល័ង្ក ពិសេសការពារអង្គ ព្រះមហាក្សតជាទីគោរពសក្ការៈដ៏ខ្ពង់ខ្ពស់បំផុត មិនឱ្យនរណារំលោភបំពានបានជាដាច់ខាត។

កាលពីថ្មីៗនេះ លោក សម រង្ស៊ី បានប្រើវេទិកាសាធារណៈប្រមាថដល់ព្រះមហាក្សត្រខ្មែរម្តងហើយម្តងទៀត ដោយកន្លងមកទណ្ឌិតក្បត់ជាតិ៣ជំនាន់នេះក៏ធ្លាប់បានប្រមាថដល់ព្រះមហាក្សត្រខ្មែរជាច្រើនលើកផងដែរ។

សម្តេចតេជោ កន្លងមកបានអះអាងថា សម្តេចមិនលើកលែងទោសឱ្យទណ្ឌិត សម រង្ស៊ី ដែលជាជនក្បត់ជាតិ ៣ជំនាន់ឡើយ។ ជាមួយគ្នានេះសម្តេចក៏បានត្រៀមកងកម្លាំងរួចជាស្រេចដើម្បីទប់ស្កាត់ចលនាបះបោរប្រឆាំង និងផ្តួលរលំរាជរដ្ឋាភិបាល ជាពិសេសត្រៀមកងកម្លាំងចាប់លោក សម រង្ស៊ី បើកាលណាជាន់ទឹកដីកម្ពុជាភ្លាម៕