អ៊ុយក្រែន៖ ប្រធានាធិបតីអាមេរិក នៅថ្ងៃចន្ទ ទី២០ ខែកុម្ភៈ បានធ្វើដំណើរទស្សនកិច្ចទៅកាន់ទីក្រុង គៀវ រដ្ឋធានីនៃប្រទេសអ៊ុយក្រែន ដែលដំណើរទស្សនកិច្ចនេះធ្វើឡើងដោយសម្ងាត់ និងតឹងរ៉ឹងបំផុត ហើយក្នុងដំណើរទស្សនកិច្ចនេះដែរ លោក Biden សន្យាថានឹងផ្តល់ជំនួយជាអាវុធក្នុងតម្លៃប្រមាណ ៥០០លានដុល្លារអាមេរិក និងការលើកទឹកចិត្តអ៊ុយក្រែន ចំពេលដែលជិតខិតដល់ខួបមួយឆ្នាំនៃការឈ្លានពានពីរុស្សីទៅលើអ៊ុយក្រែន។

សំឡេងស៊ីរ៉ែនប្រកាសអាសន្នផ្លូវអាកាសបានបន្លឺឡើងពាសពេញក្រុង Kyiv ចំពេលដែលវត្តមានលោកប្រធានាធិបតីអាមេរិក Joe Biden ធ្វើដំណើរអមដោយប្រធានាធិបតីអ៊ុយក្រែន Volodymyr Zelenskyy ដែលជាដំណើរទស្សនកិច្ចលើកដំបូងរបស់អាមេរិកចាប់តាំងពីការឈ្លានពានលើអ៊ុយក្រែនកើតមាននៅថ្ងៃទី២៤ ខែកុម្ភៈ ឆ្នាំ២០២១។ 

នៅក្នុងវិមាន Mariinsky នៃប្រធានាធិបតីអ៊ុយក្រែន លោក Joe Biden បានថ្លែងថា៖ "រយៈពេលមួយជិតមួយឆ្នាំបានកន្លងផុត! ទីក្រុងគៀវ ប្រទេសអ៊ុយក្រែន និងប្រជាធិបតេយ្យ នៅតែឈរយ៉ាងរឹងមាំ"។ លោកបន្តថា៖ "ប្រធានាធិបតីរុស្សី លោក Putin យល់ថា អ៊ុយក្រែនជាប្រទេសទន់ខ្សោយ ហើយប្រទេសលោកខាងលិចបែកខ្ញែក ព្រមទាំងគិតថា រុស្សីអាចយកឈ្នះបានពួកយើងបាន ប៉ុន្តែផ្ទុយទៅវិញផែនការនៃសង្គ្រាមរបស់លោកពូទីនកំពុងបរាជ័យ"។

គួរបញ្ជាក់ថា ដំណើរទស្សនកិច្ចរបស់លោក Joe Biden ត្រូវបានរៀបចំឡើងយ៉ាងសម្ងាត់ និងតឹងរ៉ឹងខ្លាំងបំផុត។ លោក Biden បានចាកចេញពីទីក្រុងវ៉ាស៊ីនតោននៅព្រឹកព្រលឹមថ្ងៃអាទិត្យនៅក្នុងយន្តហោះមួយដែលបានចតដោយប្រយ័ត្នប្រយែងក្នុងកន្លែងដែលមានសុវត្ថិភាពខ្ពស់បំផុត និងបានចុះចតនៅក្នុងប្រទេសប៉ូឡូញនៅល្ងាចថ្ងៃអាទិត្យ។ លោកបានបន្តដំណើរដោយរថភ្លើងមួយខ្សែដែលមានការការពារខ្ពស់បំផុត និងបានមកដល់ប្រទេសអ៊ុយក្រែននៅព្រឹកថ្ងៃចន្ទ៕