អន្តរជាតិ៖ ប៉ាណាម៉ា ធានានូវលទ្ធផលជ័យជម្នះ ២-០ ក្នុងជំនួបទល់នឹងប៉ាពួញូវហ្គីណេ ក្នុងវគ្គជម្រុះ Play-Off ចុងក្រោយ ដើម្បីបន្តដំណើរប្រជែងកៅអីវគ្គផ្តាច់ព្រ័ត្រនៃពានរង្វាន់ FIFA Women World Cup ដោយនឹងត្រូវជួបជាមួយក្រុមជម្រើសជាតិប៉ារ៉ាហ្គាយ ដែលបានទម្លាក់ក្រុមជម្រើសឆាយនីសតៃប៉ិ ក្នុងវគ្គប៉េណាល់ទីលទ្ធផល ៤-២។

ជាមួយនឹងការស្វែងរកឱកាសបង្ហាញខ្លួនលើកដំបូងក្នុងព្រឹត្តិការណ៍ World Cup នារី ក្រុមជម្រើសជាតិប៉ាណាម៉ា នឹងត្រូវជួបជាមួយក្រុមជម្រើសជាតិប៉ារ៉ាហ្គាយ នឹងត្រូវប្រកួតវគ្គជម្រុះចុងក្រោយនៅកីឡដ្ឋាន FMG Waikato ទីក្រុង Hamilton នាថ្ងៃព្រហស្បតិ៍ខាងមុខនេះ។ 

ក្រៅតែពីការប្រកួត Play-Off រវាងក្រុមជម្រើសជាតិប៉ាណាម៉ា ទល់នឹងក្រុមជម្រើសជាតិប៉ារ៉ាហ្គាយ ក៏នៅមានការប្រកួតចំនួន ២ប្រកួតផ្សេងទៀតនៅវគ្គ Play-Off ផងដែរ ពោលគឺក្រុមជម្រើសជាតិកាមេរ៉ូន ជួបជាមួយក្រុមជម្រើសជាតិព័រទុយហ្គាល់ ខណៈក្រុមជម្រើសជាតិហៃទី ជួបជាមួយក្រុមជម្រើសជាតិឈីលី ដែលនឹងធ្វើការប្រកួត Play-Off នាថ្ងៃពុធ ដែលនឹងឆ្ពោះទៅការប្រកួត World Cup នៅប្រទេសអូស្រ្តាលី និងណូវែលហ្សេឡង់ ដែលជាការប្រកួតមានក្រុមចូលរួមចំនួន ៣២ក្រុមជាលើកដំបូងបង្អស់។

ការប្រកួតបាល់ទាត់ជើងឯកស្រ្តី FIFA Women World Cup ២០២៣ នឹងធ្វើឡើងនៅថ្ងៃទី២០ ខែកក្កដា រហូតដល់ថ្ងៃទី២០ ខែសីហា ឆ្នាំ២០២៣ខាងមុខនេះ៕