ភ្នំពេញ៖ អ្នកលេងកីឡាទាំងអស់ទោះបីមិនមែនជាកីឡាអាជីពក៏ទទួលបានការព្យាបាលរបួសពីការលេងកីឡា នៅមន្ទីរពេទ្យជាតិតេជោសន្តិភាពដោយឥតគិតថ្លៃផងដែរ ដែលនេះជាការប្រកាសរបស់នាយករដ្ឋមន្ត្រី នាព្រឹកថ្ងៃច័ន្ទ ទី២០ ខែកុម្ភៈ ឆ្នាំ២០២៣នេះ។

ថ្លែងក្នុងពិធីប្រគល់វិញ្ញាបនបត្រជូនដល់សិស្សថ្នាក់វិជ្ជាជីវៈ និងនិស្សិតសាកលវិទ្យាល័យធនធានមនុស្ស សរុបប្រមាណសរុបចំនួន ១ ៩៤៦នាក់ នៅព្រឹកថ្ងៃទី២០ ខែកុម្ភៈ ឆ្នាំ២០២៣ សម្តេចតេជោ ហ៊ុន សែន បានថ្លែងថា៖ «មិនមែនតែកីឡាករអាជីពទេ ជួនកាលក្មេងៗនាំគ្នាហាត់កីឡា គ្នាត្រូវរបួស អ៊ីចឹងទេបញ្ជូនមកមន្ទីរពេទ្យនេះ យើងទទួលព្យាបាលដោយគ្មានការបង់ប្រាក់»។

សម្តេចទទួលស្គាល់ថា អ្នកទាត់បាល់ និងលេងបាល់ទះនៅតាមវាលស្រែ ក៏មិនខ្សោយជាងកីឡាករ និងកីឡាការិនីអាជីពដែរ។

សម្តេចតេជោកាលពីថ្ងៃទី១៥ ខែកុម្ភៈ ឆ្នាំ២០២៣ បានប្រកាសនៅក្នុងហ្វេសប៊ុកផ្លូវការ ឱ្យក្រសួងសុខាភិបាលគិតគូររៀបចំពេទ្យជាតិតេជោ សន្តិភាព ជាទីកន្លែងសម្រាប់ព្យាបាលកីឡាករ កីឡាការិនីដែលរងរបួសក្នុងពេលប្រកួតកីឡាដោយមិនគិតថ្លៃដែលមានគ្រែពី១០០ ទៅ២០០ ដើម្បីសម្រួលដល់ការលំបាករបស់កីឡាករ និងកីឡាការិនី ខណៈមន្ទីរពេទ្យមួយនេះមានគ្រែព្យាបាលរហូតដល់ ១ម៉ឺនគ្រែ៕