រតនគិរី៖ អាជ្ញាធរបានឃាត់ខ្លួនជនសង្ស័យចំនួន ១៥នាក់ និងដកហូតបានទឹកឃ្មុំក្លែងក្លាយដែលផលិតរួចប្រមាណ ២០០លីត្រ ទៅរក្សាទុកនៅការិយាល័យប្រឆាំងបទល្មើសសេដ្ឋកិច្ចដើម្បីចាត់ការទៅតាមនីតិវិធី។

ប្រតិបត្តិនេះធ្វើឡើងនៅយប់ថ្ងៃទី១៥ ខែកុម្ភៈ ឆ្នាំ២០២៣ ក្រោមការដឹកនាំចង្អុលដោយស្នងការនគរបាលខេត្តរតនៈគីរិ និងដឹកនាំដោយផ្ទាល់ពីព្រះរាជអាជ្ញានៃអយ្យការអមសាលាដំបូងខេត្តរតនគិរី លោក ងិន ពេជ និងលោកឧត្តមសេនីយ៍ត្រី នូវ ដារ៉ា ស្នងការរងទទួលផែនប្រឆាំងបទល្មើសសេដ្ឋកិច្ច។

បើតាមការផ្សាយព័ត៌មានរបស់ស្នងការដ្ឋាននគរបាលខេត្តរតនគីរិ ចំណុចដែលកម្លាំងអាជ្ញាធរចុះបង្រ្កាបនោះ គឺស្ថិតនៅចំណុចផ្ទះសំណាក់មិត្តភាពសំណាងល្អ ស្ថិតក្នុងភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគីរី។

ក្រៅពីទឹកឃ្មុំក្លែងក្លាយដែលសមត្ថកិច្ចរឹបអូសបាន វត្ថុតាងផ្សេងៗទៀត គឺម៉ូតូចំនួន ១៥គ្រឿង និងវត្ថុធាតុដើមសម្រាប់ផលិតមួយចំនួនក៏ត្រូវបានសមត្ថកិច្ចរឹបអូសបានផងដែរ។

បច្ចុប្បន្ន ជនសង្ស័យ រួមនឹងវត្ថុតាង ត្រូវបានឃាត់ខ្លួន និងរក្សាទុកនៅការិយាល័យប្រឆាំងបទល្មើសសេដ្ឋកិច្ចដើម្បីចាត់ការទៅតាមនីតិវិធី៕