បេឡារុស្ស៖ ប្រធានាធិបតីបេឡារុស្ស លោក Alexander Lukashenko បាននិយាយនៅថ្ងៃសុក្រ ទី១៧ ខែកុម្ភៈនេះថា លោកនឹងបញ្ជាឱ្យកងទ័ពរបស់លោករួមដៃជាមួយកងទ័ពរបស់សម្ព័ន្ធមិត្តរុស្សីប្រយុទ្ធតែម្តង ក្នុងករណីដែលបណ្តាប្រទេសផ្សេងៗណាមួយហ៊ានបើកការវាយប្រហារមកលើប្រទេសរបស់ខ្លួន។ នេះបើតាមការចុះផ្សាយរបស់សារព័ត៌៌មានរដ្ឋ Belta របស់បេឡារុស្ស។

លោក Lukashenko ដែលកន្លងមកបានព្យាយាមអះអាងបដិសេធដដែលៗចំពោះការអះអាងរបស់រដ្ឋាភិបាលទីក្រុងគៀវ (Kyiv) និងបណ្តាប្រទេសលោកខាងលិចថា ប្រទេសរបស់លោកប្រឈមនឹងការអូសទាញចូលទៅក្នុងសង្គ្រាមរវាងរុស្សី និងអ៊ុយក្រែន ប៉ុន្តែលោកក៏បានបញ្ជាក់ថាលោកគ្រោងនឹងមានជំនួបជាមួយលោកប្រធានាធិបតីរុស្សី Vladimir Putin នាចុងសប្តាហ៍នេះ។ 

សារព័ត៌មាន Belta បានដកស្រង់សំដីរបស់លោក Lukashenko មកចុះផ្សាយយ៉ាងដូច្នេះថា លោកបានត្រៀមខ្លួនរួចរាល់ក្នុងការប្រយុទ្ធរួមជាមួយកងទ័ពរុស្សីពីដែនដីរបស់បេឡារុស្សក្នុងករណីតែមួយគត់គឺក្នុងករណីដែលមានកងកម្លាំងទាហានបរទេសណាមួយចូលមកលើដែនដីរបស់យើង និងសម្លាប់ប្រជាជនបេឡារុស្សណាម្នាក់។ លោកបន្តថា ប្រសិនបើពួកគេប្រព្រឹត្តការឈ្លានពានប្រឆាំងនឹងបេឡារុស្ស ការឆ្លើយតបនឹងធ្ងន់ធ្ងរបំផុត ហើយសង្រ្គាមនឹងកើតឡើងដោយខុសធម្មតាទាំងស្រុង។ 

គួរបញ្ជាក់ថា រុស្សីបានប្រើបេឡារុសធ្វើជាទីតាំងមួយសម្រាប់ការលុកលុយពេញទីរបស់ខ្លួនទៅលើអ៊ុយក្រែនកាលពីឆ្នាំមុន ដោយបានផ្តើមការវាយប្រហារចេញពីបេឡារុស្សទៅលើអ៊ុយក្រែនសំដៅទៅលើរដ្ឋធានីគៀវ ប៉ុន្តែការឈ្លានពាននោះបានរងបរាជ័យ។ ភាពច្របូកច្របល់នៃសកម្មភាពយោធា និងសមយុទ្ធទ័ពអាកាសរួមគ្នារវាងរុស្ស៊ី និងបេឡារុស្សកាលពីដើមឆ្នាំនេះ បានធ្វើឱ្យមានការព្រួយបារម្ភឡើងវិញថាទីក្រុង Minsk អាចកំពុងរៀបចំខ្លួនដើម្បីដើរតួយ៉ាងសកម្មនៅក្នុងជម្លោះរវាងរុស្សី និងអ៊ុយក្រែន៕