ភ្នំពេញ៖ អធិការបតីអាល្លឺម៉ង់លោកស្រី អេនជេឡា មឺរកែល បានរៀបរាប់អំពីទឹកជំនន់ដែលបានបំផ្លិចបំផ្លាញផ្នែកខ្លះនៃអឺរ៉ុបខាងលិចថាជាការគួរឱ្យភ័យខ្លាច។ ចំនួនអ្នកស្លាប់នៅទូទាំងតំបន់បានកើនឡើងដល់ជាង ១៨៨នាក់ដែលភាគច្រើននៅតំបន់បាវ៉ារៀរបស់អាល្លឺម៉ង់។

នៅក្នុងលិខិតផ្លូវការរបស់នាយករដ្ឋមន្រ្តីកម្ពុជា សម្តេចតេជោ ហ៊ុន សែន ផ្ញើទៅកាន់អធិការបតីសហព័ន្ធអាល្លឺម៉ង់លោកស្រី អេនជេឡា មឺរកែល នៅយប់ថ្ងៃច័ន្ទនេះ សម្តេចបានមានប្រសាសន៍ថា “ខ្ញុំពិតជាមានក្តីក្រៀមក្រំយ៉ាងខ្លាំង នៅពេលបានទទួលដំណឹងអំពីគ្រោះទឹកជំនន់ដ៏ធ្ងន់ធ្ងរនៅរដ្ឋ North_Rhine-Westphalia និងរដ្ឋ Rhineland-Palatinate ដែលបានបង្កឱ្យមានការបាត់បង់អាយុ ជីវិតដល់ជនស្លូតត្រង់ជាច្រើនរយនាក់បាត់ខ្លួន និង បណ្តាលឲ្យមានរងរបួសរាប់ពាន់នាក់ ព្រមទាំងបាន បង្កការខូចខាតផ្ទះសម្បែង និងទ្រព្យសម្បត្តិ ជាច្រើនទៀត”។

ក្នុងនាមរាជរដ្ឋាភិបាលនិងប្រជាជនកម្ពុជា សម្តេចតេជោ ហ៊ុន សែន បានសម្តែងនូវក្តី អាណិតអាសូរ និងចូលរួមរំលែកទុក្ខដ៏ដោយស្មោះជាមួយលោកស្រីអធិកាបតី និងប្រជាជនអាល្លឺម៉ង់ ជាពិសេសក្រុមគ្រួសារនៃជនរងគ្រោះចំពោះការបាត់បង់ដ៏ធំធេងនេះ និង បានជូនពរដល់អ្នករងរបួសបានឆាប់ជាសះស្បើយ ហើយជនរងគ្រោះដែលកំពុងបាត់ខ្លួនឆាប់ត្រូវបានជួយសង្គ្រោះដោយជោគជ័យ។

នេះគឺជាគ្រោះមហន្តរាយធម្មជាតិដ៏អាក្រក់បំផុតនៅក្នុងប្រទេសអាល្លឺម៉ង់ក្នុងរយៈពេលជិត ៦០ឆ្នាំ។ ទឹកជំនន់នៅអ៊ឺរ៉ុបបានចាប់ផ្តើមកាលពីថ្ងៃពុធហើយបានជន់លិចប្រទេសអាល្លឺម៉ង់ហូឡង់អូទ្រីសនិងបែលហ្ស៊ិក។ សហគមន៍ទាំងមូលត្រូវបានកាត់ផ្តាច់ដោយគ្មានថាមពលអគ្គីសនីឬទំនាក់ទំនង៕