បន្ទាយមានជ័យ៖ ក្រុមក្បួនរថយន្ត ខេត្តបន្ទាយមានជ័យ (OFF ROAD BMC) បានធ្វើដំណើរកម្សាន្តបោះតង់រយៈពេលមួយយប់ នៅតំបន់អភិរក្សសត្វស្លាប «រហាលកេស អាវៀន» ដែលជាតំបន់ទេសចរណ៍ថ្មីមួយទើបនឹងបង្កើត ដោយមានការការពារ អភិរក្សសត្វស្លាបចម្រុះជាច្រើនប្រភេទមករស់ទៅនោះ។

បើតាមបញ្ជាក់ពីក្រុមការងារក្បួនរថយន្ត OFF ROAD BMC បានឱ្យភ្នាក់ងារ EAC News ប្រចាំខេត្តបន្ទាយមានជ័យដឹងថានេះជាដំណើរកំសាន្តលើកទី៣ដែលក្រុមរថយន្ត បានចូលរួមបោះតង់នៅតំបន់អភិរក្សសត្វស្លាប "រហាលកេស អាវៀន" ដោយមានក្រុមក្បួនរថយន្ត OFF ROAD BMC មានប្រមាណជាង ៣០គ្រឿង កាលពីចុងសប្តាហ៍កន្លងទៅ។

តំណាងក្រុមរថយន្ត OFF ROAD BMC ក៏បានបញ្ជាក់ពីគោលចំណងនៃការបង្កើតឱ្យមានក្រុមរថយន្ត OFF ROAD BMC នេះឡើងដោយមានគោលដៅ គឺចង់ធើ្វដំណើរទៅតាមរម្មណីដ្ឋានទេសចរណ៍ដែលមាននៅក្នុងប្រទេសកម្ពុជា ក៏ដូចជាបង្ហាញពីសក្ដានុពល តំបន់ទេសចរណ៍នៅកម្ពុជា ដល់ពិភពលោកបានស្គាល់ពីតំបន់ទេសចរណ៍នៅក្នុងព្រះរាជាណាចក្រកម្ពុជា។ ក្រៅពីដំណើរកំសាន្តនៅក្នុងប្រទេស ក្រុម OFF ROAD BMC ក៏និងមានគម្រោងដំណើតកំសាន្តទៅតាមប្រទេសក្នុងតំបន់អាស៊ានផងដែរ។ ក្រៅពីជួយផ្សព្វផ្សាយពីតំបន់ទរសចរណ៍នៅក្នុងប្រទេសកម្ពុជា គោលដៅសំខាន់របស់ក្រុមរថយន្ត ខេត្តបន្ទាយមានជ័យ OFF ROAD BMC មានការរៀបចំជាអំណោយផ្សេងៗ ទៅចែកជូនដល់ពលរដ្ឋក្រីក្រនៅតំបន់ដាច់ស្រាច ផ្តល់សំភារៈផ្សេងៗដល់សាលាដែលខ្វះខាត ពិសេសជួយដល់សិស្សានុសិស្សមានជីវភាពខ្វះទៅតាមលទ្ធភាពដែលក្រុមរថយន្ត និងសប្បុរសជនដែលបានចូលរួមជួយឧបត្ថម្ភ។

សូមបញ្ជាក់ផងដែរថា ក្រុមរថយន្ត OFF ROAD BMC ក៏ធ្លាប់បានចូលរួមប្រកួត ព្រឹត្តិការណ៍ប្រណាំងរថយន្ត Off Road នៅក្នុងប្រទេសថៃ ដែលមាន ៥ប្រទេសបានចូលរួមកាលពីកំឡុងខែសីហា ឆ្នាំ២០២២ ផងដែរ៕