ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ថាសម្ដេចមិនផ្លាស់ប្ដូរការសម្រេចចិត្តលើការបិទសារព័ត៌មាន VOD នោះទេ ទោះបីសារព័ត៌មាននេះសុំទោសក្ដី ព្រោះយឺតពេលទៅហើយ។

សម្ដេចតេជោបានសរសេរនៅលើហ្វេសបុកផេករបស់សម្ដេចនៅព្រឹកថ្ងៃទី១៣ ខែកុម្ភៈនេះថា ហេតុអ្វី VOD មិនសូមទោសពីល្ងាចនិងមកសូម

ទោសពេលយប់ជ្រៅក្រោយម៉ោង១២យប់ទៅវិញ។

សម្ដេចថា៖ «យើងមិនមែនកូនក្មេងបៀមដៃនោះឡើយ»។

សម្ដេចតេជោថា ការសុំទោសនេះ គឺអាចប្រហែលជាដោយសារតែព្យាយាមចាប់ពីល្ងាចថ្ងៃទី១២ មិនបានសម្រេចដោយសារពេលនោះសារព័ត៌មាននេះបានប្រើពាក្យសោកស្ដាយ ជំនួសពាក្យសុំទោស ដែលនាយករដ្ឋមន្ត្រីចង់បាន។

សម្ដេចតេជោបន្ថែមថា៖ «តើឈឺណាស់ទៅឬក្រោយត្រូវមួយកំភ្លៀង? មុនត្រូវមួយកំភ្លៀងគិតណាស់រឿងកិត្តិយសសូម្បីពាក្យសូមទោសមួយម៉ាត់មិនហ៊ាននិយាយផងតែក្រោយត្រូវមួយកំភ្លៀងបែរជាភ្លេចអស់កិត្តិយសមកសុំទោសជាងពាក់កណ្តាលអាធ្រាតទៅវិញ។ ខ្ញុំ ហ៊ុន សែន នាយករដ្ឋមន្ត្រីនៃកម្ពុជាមិនផ្លាស់ប្តូរការសម្រេចចិត្តបិទចោលវិទ្យុវីអូឌីនោះឡើយ»។

ជាមួយគ្នានេះសម្ដេចក៏បញ្ចាឲ្យស្ថាប័នមានសមត្ថកិច្ចត្រូវអនុវត្តភារកិច្ចដូចដែលបានប្រគល់កាលពីល្ងាចថ្ងៃ១២ កុម្ភៈ ២០២៣ ដោយគ្មានការកែប្រែ។

សម្ដេចថា សម្រាប់អ្នកដែលបាត់បង់ការងារត្រូវបន្ទោសមេដឹកនាំ ឬប្រទេសម្ចាស់លុយដែលកសាងកំហុសតាំងពីការផ្សាយព័ត៌មានមូលបង្កាច់រហូតដល់ល្ងង់មិនចេះទទួលខុសត្រូវលើការសុំទោសធ្វើឲ្យបុគ្គលិកបាត់បង់ការងារធ្វើ៕