អាមេរិក៖ កីឡាការិនីវាយកូនបាល់លំដាប់ពិភពលោករបស់អាមេរិក Coco Gauff បានប្រកាសកាលពីថ្ងៃទី១៨ ខែកក្កដាម្សិលមិញនេះថា នាងនឹងត្រូវខកខាន មិនអាចចូលរួមប្រកួតក្នុងព្រឹត្តិការណ៍អូឡាំពិកទីក្រុងតូក្យូ ឆ្នាំ២០២០នេះបានឡើយ ក្រោយពីបានធ្វើតេស្តវិជ្ជមានកូវីដ-១៩។

Coco Gauff ដែលធ្លាក់ចេញពីព្រឹត្តិការណ៍ Wimbledon នៅក្នុងជុំទី៤ ក្រោមថ្វីដៃកីឡាការិនីអាល្លឺម៉ង់ Angelique Kerber បានសម្តែងអារម្មណ៍សោកស្តាយដែលមិនបានចូលរួមព្រឹត្តិការណ៍អូឡាំពិកនេះ ដែលនាងបានហៅព្រឹត្តិការណ៍ដ៏ធំនេះថាជាក្តីស្រមៃរបស់នាងក្នុងអាជីពជាកីឡាការិនីវាយកូនបាល់។ 

លើបណ្តាញសង្គម Twitter កីឡាការិនី Gauff បានបង្ហោះសារថា៖ "ខ្ញុំពិតជាមានអារម្មណ៍មិនល្អឡើយ ដែលត្រូវជូនដំណឹងថា ខ្ញុំបានធ្វើតេស្តវិជ្ជមានកូវីដ-១៩ និងមិនអាចចូលរួមព្រឹត្តិការណ៍អូឡាំពិកនៅទីក្រុងតូក្យូបាន។ កន្លងមក វាគឺជាក្តីស្រមៃរបស់ខ្ញុំ ក្នុងការតំណាងឱ្យទង់ជាតិអាមេរិកក្នុងកីឡាអូឡាំពិក ខ្ញុំសង្ឃឹមថាខ្ញុំនឹងមានឱកាសសម្រេចក្តីស្រមៃនេះនៅពេលក្រោយៗទៀត"។

កីឡាការិនី Coco Gauff ដែលបានឈានឡើងដល់វគ្គ ៨នាក់ចុងក្រោយ Grand Slam ជាលើកដំបូងបង្អស់របស់ខ្លួន កាលពីខែឧសភា ក្នុងព្រឹត្តិការណ៍ French Open ក្លាយជាអត្តពលិកវាយកូនបាល់មួយរូបទៀត ដែលបានខកខានចូលរួមព្រឹត្តិការណ៍អូឡាំពិក នៅប្រទេសជប៉ុន។ កន្លងមក អត្តពលិកវាយកូនបាល់ល្បីៗជាច្រើនបានប្រកាសដកខ្លួនមិនចូលរួមព្រឹត្តិការណ៍នេះមានដូចជា Roger Federer, Rafael Nadal, Serena Williams, Victoria Azarenka, Angelique Kerber និង Bianca Andreescu។ យ៉ាងណាក្តី កីឡាករលំដាប់លេខ១ពិភពលោក Novak Djokovic និងជើងឯក Grand Slam Wimbledon ២០២១ Ashleigh Barty បានប្រកាសចូលរួមក្នុងព្រឹត្តិការណ៍អូឡាំពិកនេះ៕