សហរដ្ឋអាមេរិក៖ ក្រុមហ៊ុន Meta ដែលត្រូវបានគេស្គាល់យ៉ាងទូលំទូលាយថាជាក្រុមហ៊ុនមេគ្រប់គ្រងបណ្តាញសង្គមយក្សចំនួន ២ គឺ Facebook និង Instagram នោះ កាលពីពេលថ្មីៗនេះបានអនុញ្ញាតឱ្យលោក Donald Trump អាចភ្ជាប់ចូលប្រើប្រាស់ទៅលើបណ្តាញសង្គមផ្លូវការទាំងពីររបស់លោកវិញបានហើយ។ នេះបើតាមអ្នកនាំពាក្យក្រុមហ៊ុន Meta បានថ្លែងបញ្ជាក់កាលពីថ្ងៃសុក្រម្សិលមិញនេះ ក្រោយពីគណនីរបស់លោក Donald Trump ត្រូវបានផ្អាកដំណើរការជាង ២ឆ្នាំ ក្រោយកើតមានហេតុការណ៍កុបកម្មមួយកើតឡើងនៅវិមានកាប់ពីតូល កាលពីថ្ងៃទី០៦ ខែមករា ឆ្នាំ២០២១។​

គួរបញ្ជាក់ថា ក្រុមហ៊ុន Meta កាលពីខែមករាកន្លងទៅបានបញ្ជាក់ថា ក្រុមហ៊ុននឹងដកបំរាមចេញពីគណនីរបស់លោក Donald Trump នៅក្នុងពេលប៉ុន្មានសប្តាហ៍ខាងមុខនេះ ហើយនឹងដាក់ការពិន័យជាថ្មីបន្ថែមជាការផ្អាកគណនីរបស់លោក Trump ចន្លោះពីមួយខែទៅពីរឆ្នាំ  ប្រសិនបើអតីតប្រធានាធិបតីរូបនេះប្រព្រឹត្តទង្វើណាមួយដែលបានរំលោភបំពានលើគោលការណ៍ ជាពិសេសលើសារនយោបាយរបស់លើបណ្តាញសង្គមណាមួយរបស់ខ្លួនសាជាថ្មីម្តងទៀត។

ការប្រកាសរបស់ក្រុមហ៊ុន Meta នេះមានន័យថា លោក Trump នឹងអាចទទួលបានមកវិញនូវវេទិកាសំខាន់ៗសម្រាប់ការផ្សព្វផ្សាយគោលនយោបាយស្វែងរកសំឡេងឆ្នោតរបស់ខ្លួន និងស្វែងរកនូវការគាំទ្រផ្នែកថវិកាលើវិស័យនយោបាយរបស់លោក មុននឹងការចាប់ផ្តើមសាជាថ្មីម្តងទៀតក្នុងការឈរឈ្មោះជាបេក្ខភាពប្រធានាធិបតីសម្រាប់ការបោះឆ្នោតសកលនាឆ្នាំ២០២៤ខាងមុខនេះ។ 

គួរឱ្យដឹងផងដែរថា លោក Donald Trump មានអ្នកតាមដាន (Followers) លើបណ្តាញសង្គម Facebook ចំនួន ២៣លានគណនី និងនៅលើ Instagram មានអ្នកតាមដានចំនួនជាង ៣៤លានគណនី៕