ថៃ៖ ប្រទេសថៃ បានរាយការណ៍ពីចំនួនតួលេខអ្នកឆ្លងកូវីដ-១៩ថ្មីចំនួន ១១,៧៨៤ នាក់នៅថ្ងៃចន្ទ ទី១៩ ខែកក្កដានេះ ស្របពេលដែលចំនួនតួលេខអ្នកឆ្លងថ្មីកើនឡើងខ្ពស់បំបែកកំណត់ត្រាថ្មី ៤ថ្ងៃបន្តបន្ទាប់ ហើយថៃកំពុងប្រយុទ្ធមិនដកដៃទល់នឹងរលកថ្មីដ៏អាក្រក់បំផុតមិនធ្លាប់ជួបនេះ។
ប្រទេសនៅក្នុងតំបន់អាស៊ីអាគ្នេយ៍មួយនេះ ក៏បានប្រកាសពីអ្នកស្លាប់ថ្មីចំនួន ៨១នាក់ទៀត នាំឱ្យចំនួនអ្នកស្លាប់កើនឡើងដល់ ៣,៤២២នាក់ ខណៈចំនួនអ្នកឆ្លងកូវីដ-១៩បានកើនឡើងសរុបរហូតដល់ ៤១៥,១៧០នាក់។
កាលពីថ្ងៃអាទិត្យកន្លងទៅ រដ្ឋាភិបាលថៃបានប្រកាសដាក់ចេញនូវវិធានការរឹតត្បិតបន្ថែមទៀតពាក់ព័ន្ធនឹងការធ្វើដំណើរ រួមទាំងទីតាំងផ្សារទំនើបជាដើម ជាពិសេសគឺបំរាមគោចរពេលយប់ ដោយអនុវត្តពីម៉ោង ៩យប់ ដល់ម៉ោង ៤ទាបភ្លឺ ជំហានដំបូងអនុវត្តទៅលើខេត្ត ៣ជាមុនសិនរួមមាន ខេត្តឈុនបុរី, អយុធ្យា និងខេត្តឆាឆេងសៅ។
ក្រៅពីនេះ ដើម្បីកាត់បន្ថយការរីករាលដាលឆ្លងជាចង្កោម រដ្ឋាភិបាលថៃក៏បានដាក់បំរាមមិនឱ្យមានការប្រមូលផ្តុំហ្វូងមនុស្សច្រើននោះឡើយ ដោយអ្នកដែលប្រព្រឹត្តល្មើសនឹងត្រូវប្រឈមក៏ជាប់ពន្ធនាគាររយៈពេល ២ឆ្នាំ ឬអាចប្រកាសពិន័យជាប្រាក់ចំនួន ៤ម៉ឺនបាត (ជាង ១,៣០០ដុល្លារអាមេរិក)៕
