ម៉ាឡេស៊ី៖ លោក Khairy Jamaluddin អតីតរដ្ឋមន្រ្តីសុខាភិបាលម៉ាឡេស៊ី នឹងចាប់យកអាជីបការងារថ្មី ពោលគឺលោកនឹងបម្រើការងារជាពិធីករវិទ្យុ (Radio DJ) នៅស្ថានីយ៍វិទ្យុមួយដែលមានឈ្មោះថា Hot FM។ នេះបើយោងតាមការចុះផ្សាយដោយប្រព័ន្ធផ្សព្វផ្សាយកម្សាន្តក្នុងប្រទេសម៉ាឡេស៊ី។
តាមការចុះផ្សាយដោយសារព័ត៌មាន New Straits Times បានឱ្យដឹងថា លោក Khairy នឹងចាប់ផ្តើមបំពេញការងារពីថ្ងៃពុធសប្តាហ៍ក្រោយតទៅ ដោយលោកនឹងកាន់កម្មវិធីមួយមានឈ្មោះថា Bekpes Hot segment របស់ស្ថានីយ៍វិទ្យុនេះផ្ទាល់។ លោកក៏បានបញ្ជាក់ផងដែរថា លោកនឹងចូលបំពេញការងារនេះពិតមែន តាមរយៈកិច្ចសម្ភាសន៍មួយនាថ្ងៃព្រហស្បតិ៍នេះ។
ដោយឡែក បើតាមក្រុមហ៊ុន Media Prima Audio ដែលជាម្ចាស់នៃស្ថានីយ៍វិទ្យុនេះបានឱ្យដឹងថា លោក Khairy នឹងបំពេញការងារជាពិធីករ ដោយកម្មវិធីរបស់លោកនឹងមានផ្សាយរៀងរាល់ថ្ងៃចន្ទ ដល់ថ្ងៃសុក្រ វេលាម៉ោង ៦ដល់ម៉ោង ១០ព្រឹក។ ក្រុមហ៊ុនខាងលើនេះថែមទាំងបានបញ្ជាក់ទៀតថា សំណើឱ្យអតីតរដ្ឋមន្រ្តីរូបនេះមកបំពេញការងារ គឺធ្វើឡើងតាមរយៈលិខិតផ្ញើទៅកាន់ Instagram របស់់លោកផ្ទាល់តែម្តង។
គួរបញ្ជាក់ថា កាលពីខែមករាកន្លងទៅ លោក Khairy ត្រូវបានបណ្តេញចេញពីតំណែងដោយអង្គការជាតិសហព័ន្ធម៉ាឡេស៊ី (UMNO) បន្ទាប់ពីបញ្ចប់កិច្ចប្រជុំក្រុមប្រឹក្សាកំពូលរបស់បក្ស។ សមាជិកក្រុមប្រឹក្សាកំពូល UMNO លោក Puad Zarkashi បានអះអាងនៅក្នុងការបង្ហោះលើទំព័រ Facebook របស់លោកផ្ទាល់ កាលពីថ្ងៃទី២៨ ខែមករានេះថា លោក Khairy ត្រូវបានបណ្តេញចេញពីតំណែង ដោយសារតែការរិះគន់គណបក្ស និងប្រធានគណបក្សនេះផ្ទាល់ក្នុងអំឡុងពេលយុទ្ធនាការ GE15៕