ភ្នំពេញ៖ គណៈប្រតិភូជាន់ខ្ពស់ដឹកនាំដោយលោក ហ្វ្រាំង វ៉ាល់ធ័រ ឆ្តែនម៉ៃយ័រ ( H.E.Mr.Frank-Walter Steinmeier ) ប្រធានាធិបតីនៃសាធារណរដ្ឋសហព័ន្ធអាល្លឺម៉ង់ និងភរិយាលោកស្រី អែលឃើ បឿឌិនបិនឌ័រ ( Mrs. Elke Büdenbender) នឹងអញ្ជើញមកបំពេញទស្សនកិច្ចផ្លូវការរយៈពេល ៣ថ្ងៃ នៅប្រទេសកម្ពុជា ចាប់ពីថ្ងៃទី១៤ ដល់ថ្ងៃទី១៦ ខែកុម្ភៈ ឆ្នាំ២០២៣។ នេះបើយោងតាមសេចក្តីប្រកាសព័ត៌មានចេញផ្សាយនៅលើគេហទំព័ររបស់ក្រសួងការបរទេសអាល្លឺម៉ង់។

ក្នុងដំណើរទស្សនាកិច្ចនេះដែរ ប្រធានាធិបតីអាល្លឺម៉ង់នឹងសិក្សាដោយផ្ទាល់អំពីស្ថានភាពបច្ចុប្បន្ននៃកិច្ចខិតខំប្រឹងប្រែងបោសសម្អាតមីនដែលកំពុងគាំទ្រដោយអាល្លឺម៉ង់ និងអំពីការងារជួសជុលដែលកំពុងធ្វើឡើងនៅបរិវេណប្រាសាទអង្គរវត្ត ហើយលោកក៏នឹងទៅទស្សនាទីតាំងរំលឹកវិញ្ញាណក្ខន្ធជនរងគ្រោះក្នុងរបបខ្មែរក្រហមផងដែរ។

ជាមួយគ្នានេះដែរ អគ្គលេខាធិការព្រឹទ្ធសភា លោក អ៊ុ សារឹទ្ធ នៅថ្ងៃទី៦ ខែកុម្ភៈកន្លងទៅបានដឹកនាំកិច្ចជុំពិនិត្យពិភាក្សាលើការងារសំខាន់ៗសម្រាប់ត្រៀមទទួលបដិសណ្ឋារកិច្ចស្វាគមន៍ ប្រធានាធិបតីសាធារណរដ្ឋសហព័ន្ធអាល្លឺម៉ង់ ដែលនឹងដឹកនាំមកបំពេញទស្សនកិច្ចផ្លូវការ នៅព្រះរាជាណាចក្រកម្ពុជានេះ។

នៅថ្ងៃទី១៦ ខែកុម្ភៈ ឆ្នាំ២០២៣ លោក Frank-Walter Steinmeier និងលោកស្រី Elke Bundenbender នឹងទៅបំពេញទស្សនកិច្ចនៅប្រទេសម៉ាឡេស៊ី បន្ទាប់ពីបំពេញទស្សនកិច្ចក្នុងប្រទេសកម្ពុជា។